Milliy matbuot markazida Favqulodda vaziyatlar vazirligi tomonidan suv havzalarida dam olayotgan fuqarolarning xavfsizligini ta’minlashga bag‘ishlangan matbuot anjumani tashkil etildi. Bu haqda O‘zA xabar berdi.
Tadbirda Favqulodda vaziyatlar, Ichki ishlar va Sog‘liqni saqlash vazirliklari mutaxassislari ishtirok etdi.
Yoz oylarida havo ancha issiq bo‘ladi, shu bois Toshkent aholisi ham ko‘p vaqtini suv havzalari yaqinida o‘tkazadi. Ularning suv ob’ektlaridagi beparvo xatti-harakatlari, to‘g‘ri tashkillashtirilmagan va nazoratsiz cho‘milish jiddiy xavflarga sabab bo‘ladi.
Afsuski, Toshkentning o‘ziga xos iqlimi tufayli shaharda ommaviy cho‘milishni yo‘lga qo‘yish uchun jihozlanishi mumkin bo‘lgan suv havzalari u qadar ko‘p emas. Muqobil joylar bo‘lmagani sababli dam oluvchilar taqiq to‘g‘risidagi ma’lumotnomaga e’tibor bermay, ma’n etilgan suv havzalarida cho‘milib, o‘zlari va farzandlari hayotini jiddiy xavf ostiga qo‘yadi.
Favqulodda vaziyatlar vazirligining favqulodda holatlarning oldini olish boshqarmasi boshlig‘i Shuhrat Dadaxonovning ma’lum qilishicha, belgilanmagan joylarda cho‘milish suv obyektlarida insonlar halok bo‘lishining asosiy sabablaridan biridir. Cho‘miluvchilarning xavfsizligini ta’minlash maqsadida 2018-yilda cho‘milish mavsumida FVV turli manfaatdor vazirlik va idoralar bilan hamkorlikda 146 dan ziyod reyd o‘tkazdi. Suv havzalari yaqinida 810 ta ogohlantirish belgisi o‘rnatildi, qariyb 47 ta kuzatuv posti tashkil etildi.
Statistikaga ko‘ra, yoz mavsumida ochiq suv havzalari va basseynlarda cho‘miladiganlarning asosiy qismi bolalar va yoshlar. Shu bois FVV xodimlari ular bilan tushuntirish ishlarini olib bordi. Masalan, 2018-yildan boshlab FVV tomonidan suv havzalari yaqinida o‘zini tutish qoidalari va belgilanmagan joylarda cho‘milish xavfini tushuntirishga bag‘ishlangan seminar va suhbatlar tashkil etilgan.
Joriy yilda ham suv havzalarini o‘rganish va ularni cho‘milish mavsumiga tayyorlash ishlari olib borilmoqda. Bu borada mamlakatdagi barcha suv havzalaridan namunalar olinib, ularning sanitar va muhandislik-texnik holati o‘rganildi.
Izoh (0)