Миллий матбуот марказида Фавқулодда вазиятлар вазирлиги томонидан сув ҳавзаларида дам олаётган фуқароларнинг хавфсизлигини таъминлашга бағишланган матбуот анжумани ташкил этилди. Бу ҳақда ЎзА хабар берди.
Тадбирда Фавқулодда вазиятлар, Ички ишлар ва Соғлиқни сақлаш вазирликлари мутахассислари иштирок этди.
Ёз ойларида ҳаво анча иссиқ бўлади, шу боис Тошкент аҳолиси ҳам кўп вақтини сув ҳавзалари яқинида ўтказади. Уларнинг сув объэктларидаги бепарво хатти-ҳаракатлари, тўғри ташкиллаштирилмаган ва назоратсиз чўмилиш жиддий хавфларга сабаб бўлади.
Афсуски, Тошкентнинг ўзига хос иқлими туфайли шаҳарда оммавий чўмилишни йўлга қўйиш учун жиҳозланиши мумкин бўлган сув ҳавзалари у қадар кўп эмас. Муқобил жойлар бўлмагани сабабли дам олувчилар тақиқ тўғрисидаги маълумотномага эътибор бермай, маън этилган сув ҳавзаларида чўмилиб, ўзлари ва фарзандлари ҳаётини жиддий хавф остига қўяди.
Фавқулодда вазиятлар вазирлигининг фавқулодда ҳолатларнинг олдини олиш бошқармаси бошлиғи Шуҳрат Дадахоновнинг маълум қилишича, белгиланмаган жойларда чўмилиш сув объектларида инсонлар ҳалок бўлишининг асосий сабабларидан биридир.
Чўмилувчиларнинг хавфсизлигини таъминлаш мақсадида 2018 йилда чўмилиш мавсумида ФВВ турли манфаатдор вазирлик ва идоралар билан ҳамкорликда 146 дан зиёд рейд ўтказди. Сув ҳавзалари яқинида 810 та огоҳлантириш белгиси ўрнатилди, қарийб 47 та кузатув пости ташкил этилди.
Статистикага кўра, ёз мавсумида очиқ сув ҳавзалари ва бассейнларда чўмиладиганларнинг асосий қисми болалар ва ёшлар. Шу боис ФВВ ходимлари улар билан тушунтириш ишларини олиб борди. Масалан, 2018 йилдан бошлаб ФВВ томонидан сув ҳавзалари яқинида ўзини тутиш қоидалари ва белгиланмаган жойларда чўмилиш хавфини тушунтиришга бағишланган семинар ва суҳбатлар ташкил этилган.
Жорий йилда ҳам сув ҳавзаларини ўрганиш ва уларни чўмилиш мавсумига тайёрлаш ишлари олиб борилмоқда. Бу борада мамлакатдаги барча сув ҳавзаларидан намуналар олиниб, уларнинг санитар ва муҳандислик-техник ҳолати ўрганилди.
Изоҳ (0)