JTI’ning O‘zbekistondagi aksizosti tovarlari fabrikasida uchinchi ishlab chiqarish liniyasi ishga tushdi

O‘zbekiston Prezidenti tomonidan e’lon qilingan “Faol investitsiyalar va ijtimoiy rivojlanish yili” doirasida Yaponiyaning JTI kompaniyasining O‘zbekistondagi aksizosti tovarlari fabrikasida uchinchi ishlab chiqarish liniyasi ishga tushdi. Hamkorlikdagi loyiha 2015-yilda yo‘lga qo‘yilgan bo‘lib, qisqa muddat ichida fabrikada ishlab chiqarilgan tovar belgilari O‘zbekiston umumiy bozorining 10 foizdan ortiq hajmini egalladi.

Birgina 2018-yilning o‘zida qo‘shma korxona tomonidan O‘zbekiston byudjetiga 100 milliard so‘m (taxminan 12 million AQSh dollari)dan ortiq soliq va to‘lovlar to‘landi hamda fabrikada 100 dan ortiq va respublikaning turli hududlarida 200 dan ziyod yangi ish o‘rinlari yaratildi.

JTI’ning Qozog‘iston va Markaziy Osiyodagi bosh direktori Yevgeniy Nikolskiy kompaniyaning eksport rejalariga to‘xtalib, jumladan, shunday dedi:

“O‘zbekistonning iqtisodiy va ishlab chiqarish salohiyati o‘sib bormoqda, bu esa o‘zbek mahsulotlarini joriy yilning o‘zida Markaziy Osiyo mamlakatlariga eksport qilishni boshlash imkonini beradi. Buni Qirg‘iziston bozoridan boshlash rejalashtirilmoqda.

O‘zbekistonda yangi hamkorlikdagi loyihaning amalga oshirilishi — jahon iqtisodiyotiga integratsiyalashuv va mamlakat rahbariyati tomonidan qulay sarmoyaviy muhit yaratilganining natijasidir. Bu borada bizning loyihamiz yaxshi misol bo‘la oladi, bugungi kunda loyihamizning umumiy investitsion hajmi 40 million dollarga teng. Xalqaro kompaniyalar hamkorligida O‘zbekistonda aksizosti mahsulotlari ishlab chiqaruvchi yangi mahalliy korxonaning yaratilishi va rivojlanishi jahonga mashhur markalari ishlab chiqarilishiga imkon beradi, bu orqali ichki bozorda iste’molchilar uchun mahsulotlar turi ortadi va tabiiy ravishda kontrabanda kamayib, byudjetga tushadigan soliq tushumlari ko‘payishiga olib keladi.

O‘zbekiston qutilarni raqamlash va mahsulotning fabrikadan boshlab harakatini kuzatish bo‘yicha Rossiya va Qozog‘iston tajribasini o‘rganmoqda. Raqamli kodlar yordamida mahsulotlarning do‘kon rastalariga va so‘nggi foydalanuviga yetib borishini monitoring qilish byudjetga tushadigan soliq tushumlari ortishida yaxshi imkoniyat yaratadi”.