Ўзбекистон Президенти томонидан эълон қилинган «Фаол инвестициялар ва ижтимоий ривожланиш йили» доирасида Япониянинг JTI компаниясининг Ўзбекистондаги акцизости товарлари фабрикасида учинчи ишлаб чиқариш линияси ишга тушди. Ҳамкорликдаги лойиҳа 2015 йилда йўлга қўйилган бўлиб, қисқа муддат ичида фабрикада ишлаб чиқарилган товар белгилари Ўзбекистон умумий бозорининг 10 фоиздан ортиқ ҳажмини эгаллади.
Биргина 2018 йилнинг ўзида қўшма корхона томонидан Ўзбекистон бюджетига 100 миллиард сўм (тахминан 12 миллион АҚШ доллари)дан ортиқ солиқ ва тўловлар тўланди ҳамда фабрикада 100 дан ортиқ ва республиканинг турли ҳудудларида 200 дан зиёд янги иш ўринлари яратилди.
JTI’нинг Қозоғистон ва Марказий Осиёдаги бош директори Евгений Николский компаниянинг экспорт режаларига тўхталиб, жумладан, шундай деди:
«Ўзбекистоннинг иқтисодий ва ишлаб чиқариш салоҳияти ўсиб бормоқда, бу эса ўзбек маҳсулотларини жорий йилнинг ўзида Марказий Осиё мамлакатларига экспорт қилишни бошлаш имконини беради. Буни Қирғизистон бозоридан бошлаш режалаштирилмоқда.Ўзбекистонда янги ҳамкорликдаги лойиҳанинг амалга оширилиши — жаҳон иқтисодиётига интеграциялашув ва мамлакат раҳбарияти томонидан қулай сармоявий муҳит яратилганининг натижасидир. Бу борада бизнинг лойиҳамиз яхши мисол бўла олади, бугунги кунда лойиҳамизнинг умумий инвестицион ҳажми 40 миллион долларга тенг. Халқаро компаниялар ҳамкорлигида Ўзбекистонда акцизости маҳсулотлари ишлаб чиқарувчи янги маҳаллий корхонанинг яратилиши ва ривожланиши жаҳонга машҳур маркалари ишлаб чиқарилишига имкон беради, бу орқали ички бозорда истеъмолчилар учун маҳсулотлар тури ортади ва табиий равишда контрабанда камайиб, бюджетга тушадиган солиқ тушумлари кўпайишига олиб келади.
Ўзбекистон қутиларни рақамлаш ва маҳсулотнинг фабрикадан бошлаб ҳаракатини кузатиш бўйича Россия ва Қозоғистон тажрибасини ўрганмоқда. Рақамли кодлар ёрдамида маҳсулотларнинг дўкон расталарига ва сўнгги фойдаланувига етиб боришини мониторинг қилиш бюджетга тушадиган солиқ тушумлари ортишида яхши имконият яратади».
Изоҳ (0)