22 апрелнинг эътиборга молик янгиликлари — «Дарё» дайжестида.
Нега бу йил апрель ойи серёмғир бўлди? «Ўзгидромет» маркази жавоб берди.
Деярли бутун ой давомида Ўзбекистон ҳудуди устида жанубда ҳосил бўлган нам ҳаво оқимлари Россиянинг Европа ҳудудидан кириб келган ва у нисбатан совуқ ҳаво оқимлари билан доимий равишда қўшилиб турди. Ҳаво оқимларининг бундай бир-бирига қўшилиши эса кучли жала ҳосил бўлиши учун қулай шароит яратар экан.
***
Бухородаги метан газ қуйиш шохобчасида Nexia портлаб кетди.
Бош прокуратура маълум қилишича, Қизилтепа тумани, «Бўлакработ» маҳалласи ҳудудида жойлашган «Қизилтепа Зарафшон алангаси» МЧЖга тегишли метан газ қўйиш шохобчасида метан газ қуйиши вақтида, автомашинага ўрнатилган газ баллони босим натижасида тўсатдан чақнаши натижасида 2 қисмга бўлиниб кетган.
***
Нилуфар Усмонова 5 йил аввал исмини ўзгартирганини маълум қилди.
«Ассалому алайкум, мен бу сиз билган Нилуфар Усмонова, аммо 5 йилдан буён мен Аишаман.
Авваламбор, Алҳамдулиллаҳ, муслимаман. Биласизми мен исмимнинг ҳам муслималарга хос бўлишини жуда ҳам хоҳлардим. Қолаверса, бу исм менга жудаям ёқиб қолган. Мен исм эгаси Аиша онамизга ҳавас қилиб, азон айттириб бу исмни қўйдим», — деб ёзди хонанда Instagram’да.
***
Порошенко Украина президенти сайловидаги мағлубиятини тан олди.
Порошенко Владимир Зеленскийга қўнғироқ қилган ва уни ғалаба билан табриклаган. Экзит-пол натижаларига кўра, Зеленский сайловчиларнинг 73,2, Порошенко эса 25,3 фоиз овозини тўплаган.
***
Ўзбекистонда эркаклар ва аёллар учун никоҳ ёши тенглаштирилади.
Бола ҳуқуқлари кафолатларини янада кучайтиришга оид қўшимча чора-тадбирлар тўғрисидаги Президент қарори қабул қилинди. Унга мувофиқ, 2019 йил 1 сентябрдан эркаклар ва аёллар учун никоҳ ёши ўн саккиз ёш этиб белгиланди.
Изоҳ (0)