Toshkent xalqaro aeroportida havo kemalariga xizmat ko‘rsatuvchi zamonaviy yoqilg‘i quyish kompleksini qurish rejalashtirilyapti, deya xabar beradi “Xalq so‘zi Online”. Bu haqda hukumat qarori loyihasi e’lon qilindi.
Unda respublika aeroportlarini aviatsiya yoqilg‘isi bilan ta’minlash tizimini takomillashtirish, xorij aviakompaniyalarining, jumladan, aeroportlarda ko‘rsatilayotgan xizmatlarning tijoriy jozibadorligini oshirishi yo‘li bilan O‘zbekiston aeroportlari orqali parvozlarni amalga oshirishga jalb etish ko‘zda tutilgan. Havo kemalariga yoqilg‘i quyish, aviatsiya yoqilg‘isini yetkazib berish jarayonlariga bozor mexanizmlarini joriy etish shular jumlasidandir.
E’tiborlisi, Jizzakh Petroleum qo‘shma korxonasi zamonaviy yoqilg‘i quyish kompleksi qurilishi buyurtmachisi bo‘lib kiryapti. Shu asnoda qo‘shma korxona ishtirokchilari ulushi qayta taqsimlash rejalashtirilgan. Shundan 70 foizi xorijlik investorlarga, 30 foizi “O‘zbekneftegaz” kompaniyasiga beriladi.
Hukumat, shuningdek, Sergeli tumanida joylashgan maydoni 10 gektarlik yoqilg‘i markaziy bazasini bino va inshootlari bilan bepulga bermoqchi.
Eslatib o‘tamiz, bundan oldin xorij benzini bilan savdo qiluvchi avtoyoqilg‘i stansiyalari tarmog‘ini o‘z ichiga olgan qo‘shma korxona tuzish rejalashtirilgan edi. Biroq bu ish Toshkentdagi bir nechta obyektlardan so‘ng to‘xtab qolgandi.
Bundan tashqari, kompaniya Jizzax neftni qayta ishlash zavodi loyihasi bilan shug‘ullandi. Keyinchalik ushbu loyiha konsepsiyasi qayta ko‘rib chiqilishi munosabati bilan uni amalga oshirish to‘xtatilgan edi.
Izoh (0)