Тошкент халқаро аэропортида ҳаво кемаларига хизмат кўрсатувчи замонавий ёқилғи қуйиш комплексини қуриш режалаштириляпти, дея хабар беради «Халқ сўзи Online». Бу ҳақда ҳукумат қарори лойиҳаси эълон қилинди.
Унда республика аэропортларини авиация ёқилғиси билан таъминлаш тизимини такомиллаштириш, хориж авиакомпанияларининг, жумладан, аэропортларда кўрсатилаётган хизматларнинг тижорий жозибадорлигини ошириши йўли билан Ўзбекистон аэропортлари орқали парвозларни амалга оширишга жалб этиш кўзда тутилган. Ҳаво кемаларига ёқилғи қуйиш, авиация ёқилғисини етказиб бериш жараёнларига бозор механизмларини жорий этиш шулар жумласидандир.
Эътиборлиси, Jizzakh Petroleum қўшма корхонаси замонавий ёқилғи қуйиш комплекси қурилиши буюртмачиси бўлиб киряпти. Шу аснода қўшма корхона иштирокчилари улуши қайта тақсимлаш режалаштирилган. Шундан 70 фоизи хорижлик инвесторларга, 30 фоизи «Ўзбекнефтегаз» компаниясига берилади.
Ҳукумат, шунингдек, Сергели туманида жойлашган майдони 10 гектарлик ёқилғи марказий базасини бино ва иншоотлари билан бепулга бермоқчи.
Эслатиб ўтамиз, бундан олдин хориж бензини билан савдо қилувчи автоёқилғи станциялари тармоғини ўз ичига олган қўшма корхона тузиш режалаштирилган эди. Бироқ бу иш Тошкентдаги бир нечта объектлардан сўнг тўхтаб қолганди.
Бундан ташқари, компания Жиззах нефтни қайта ишлаш заводи лойиҳаси билан шуғулланди. Кейинчалик ушбу лойиҳа концепцияси қайта кўриб чиқилиши муносабати билан уни амалга ошириш тўхтатилган эди.
Изоҳ (0)