11-aprel kuni Toshkentda o‘tgan seminarda olimlar Amudaryo havzasida iqlim o‘zgarishining suv sifatiga salbiy ta’sirini namoyon etuvchi natijalarni taqdim etdi. Bu haqda AQShning O‘zbekistondagi elchixonasi matbuot xizmati “Daryo” ga xabar berdi.
“Amudaryo havzasida iqlim oqibatida suv sifati muammolari bo‘yicha ilmiy asoslangan dalillarni taqdim etish” tadqiqot loyihasi Markaziy Osiyo mintaqaviy ekologik markazi (CAREC) tomonidan G‘arbiy Virjiniya universiteti bilan hamkorlikda AQSh Taraqqiyot agentligining (USAID) Tadqiqotda ishtirok etishni yaxshilash yo‘lidagi hamkorlik (PEER) dasturi asosida o‘tkazilgan.
Loyiha Markaziy Osiyodagi eng katta daryolar tizimlarining birida suvning sifati va rivojlanayotgan iqlim o‘zgarishlari o‘rtasidagi munosabatlarni o‘rganib chiqdi. CAREC ijrochi direktori, doktor Iskandar Abdullayev iqlim o‘zgarishi har yilgi daryo oqimining kamayishi va qurg‘oqchilik mavsumining ko‘payishiga ta’sir ko‘rsatishi oqibatida uy sharoiti va qishloq xo‘jaligida suv sifatining yomonlashishiga olib kelishini ta’kidlab o‘tdi. Tadqiqot natijalari hokimiyat suvdan foydalanish va boshqaruvi bo‘yicha to‘g‘ri qarorlar qabul qilishiga yordam beradi.
PEER, AQSh olimlarini USAIDning dasturlari mavjud bo‘lgan davlatlardagi olimlar bilan hamkorlikda ishlashga birlashtiradigan raqobatbardosh mukofot dasturidir. PEER hamkorlik tadqiqotlarini qo‘llab-quvvatlaydi, uzoq muddatli munosabatlarni shakllantiradi va butun dunyodagi insonlar hayotini yaxshilash uchun imkoniyatlarga ega bo‘lgan ilm-fan ma’lumotlarini rivojlantiradi.
2011-yildan buyon, PEER 50 ga yaqin mamlakatlarda 300 dan ortiq tadqiqot loyihalarini moliyalashtirgan. Markaziy Osiyo va Afg‘onistonda PEER suvni boshqarish va iqlim o‘zgarishi bo‘yicha 17 ta hamkorlikdagi tadqiqotlarni qo‘llab-quvvatlagan, ulardan yettitasi O‘zbekistonda olib borilgan.
Izoh (0)