Farg‘ona viloyati IIB xodimlari tomonidan o‘tkazilgan “Tozalash–antiterror” tadbiri davomida Qo‘qon shahrida yashovchi T.K.ga tegishli bo‘lgan uyali telefon xolislar ishtirokida ko‘zdan kechirilgan. Tekshiruv davomida T.K.ning Telegram messenjerida diniy mazmundagi ma’ruza va videoroliklar borligi aniqlanib, daliliy ashyo tariqasida olingan. Bu haqda viloyat IIB matbuot xizmati “Daryo”ga xabar bermoqda.
Olib borilgan surishtiruv ishlari davomida T.K 2018-yilning iyul oyidan 2019-yilning fevraliga qadar internetdan aqidaparastlik g‘oyalari bilan yo‘g‘rilgan diniy mazmundagi ma’ruzani o‘ziga tegishli bo‘lgan uyali telefon xotirasiga yozib olib, kelgusida tarqatish maqsadida saqlab kelgan. 2019-yil 14-fevral kuni diniy mazmundagi ma’ruzani Dang‘ara tumanida yashovchi fuqaro M.A.ning Telegram’dagi profiliga o‘tkazib bergan.
Sudga oid adabiyotshunoslik ekspertizasining xulosasiga ko‘ra, M.A.ga tegishli uyali telefondagi profildan olingan diniy mazmundagi ma’ruza aqidaparastlik g‘oyalari bilan yo‘g‘rilganligi va mazkur g‘oyalarni targ‘ib qiluvchi material ekanligi ko‘rsatib o‘tilgan.
T.K.ga nisbatan Jinoyat Kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandi bilan jinoyat ishi qo‘zg‘atilib, tergov ishlari olib borilmoqda. Ushbu modda bo‘yicha aybdor deb topilgan shaxs besh yildan sakkiz yilgacha ozodlikdan mahrum qilinishi mumkin.
Izoh (0)