Shu yil 26—30-avgust kunlari Samarqand shahrida “Sharq taronalari” o‘n ikkinchi xalqaro musiqa festivali o‘tkaziladi. Bu haqda Zarnews xabar bermoqda.
2019-yil 26-fevralda Prezidentning xalqaro musiqa festivalini o‘tkazishga tayyorgarlik ko‘rish chora-tadbirlari to‘g‘risidagi qarori qabul qilindi. Mazkur qarorga binoan hozirdanoq tayyorgarlik ishlari boshlab yuborildi. Jumladan, Registon maydoni atrofidagi uy-joylar tartibga keltirilmoqda.
— Majmua atrofida 14 ta ko‘p qavatli uy bor, —deydi viloyat Uy-joy, kommunal xizmat ko‘rsatish boshqarmasi boshlig‘i Rustam Sattorov. — Uy-joylarda mukammal ta’mirlash ishlari olib borilmoqda. Samarqand viloyatini obodonlashtirish va farovonligini oshirish maqsadida 50 million AQSh dollari miqdorida mablag‘ ajratildi. Shu mablag‘ning 5,3 milliard so‘mi ta’mirlash ishlariga yo‘naltiriladi.
Jumladan, Registon ko‘chasidagi beshta uyning tashqi ko‘rinishiga milliy tus — sharqona bezak beriladi. Uylarning orqa tomonida qo‘shimcha ravishda yana uchta avtoturarjoy, ikkita bolalar maydonchasi, sakkizta shiypon quriladi. To‘rtta joyda sug‘orish artezian qudug‘i qaziladi. Hozir bu ishlar jadal olib borilmoqda. Obodonlashtirish ishlari shu oy oxiriga qadar nihoyasiga yetkaziladi.
Izoh (0)