Шу йил 26—30 август кунлари Самарқанд шаҳрида «Шарқ тароналари» ўн иккинчи халқаро мусиқа фестивали ўтказилади. Бу ҳақда Zarnews хабар бермоқда.
2019 йил 26 февралда Президентнинг халқаро мусиқа фестивалини ўтказишга тайёргарлик кўриш чора-тадбирлари тўғрисидаги қарори қабул қилинди. Мазкур қарорга биноан ҳозирданоқ тайёргарлик ишлари бошлаб юборилди. Жумладан, Регистон майдони атрофидаги уй-жойлар тартибга келтирилмоқда.
— Мажмуа атрофида 14 та кўп қаватли уй бор, —дейди вилоят Уй-жой, коммунал хизмат кўрсатиш бошқармаси бошлиғи Рустам Сатторов. — Уй-жойларда мукаммал таъмирлаш ишлари олиб борилмоқда. Самарқанд вилоятини ободонлаштириш ва фаровонлигини ошириш мақсадида 50 миллион АҚШ доллари миқдорида маблағ ажратилди. Шу маблағнинг 5,3 миллиард сўми таъмирлаш ишларига йўналтирилади.
Жумладан, Регистон кўчасидаги бешта уйнинг ташқи кўринишига миллий тус — шарқона безак берилади. Уйларнинг орқа томонида қўшимча равишда яна учта автотураржой, иккита болалар майдончаси, саккизта шийпон қурилади. Тўртта жойда суғориш артезиан қудуғи қазилади. Ҳозир бу ишлар жадал олиб борилмоқда. Ободонлаштириш ишлари шу ой охирига қадар ниҳоясига етказилади.
Изоҳ (0)