9-aprelning e’tiborga molik yangiliklari — “Daryo” dayjestida.
Buxoroda poyezd va yuk mashinasi to‘qnashishi oqibatida Turkiya fuqarosi halok bo‘ldi.
Turkiya Respublikasi fuqarosi Zaki Kiraj o‘zining boshqaruvida bo‘lgan Mercedes-Benz rusumli davlat raqami TR 76 DH 642 bo‘lgan tirkamali yuk avtomashinasi bilan yo‘lini kesib o‘tayotgan TEM2-5808-raqamli teplovozning yoqilg‘i bakiga urib, yo‘l-transport hodisasi sodir etgan.
Ijtimoiy tarmoqlarda hodisa aks etgan videolar tarqaldi.
***
Xalqaro baxshichilik festivalida 5 yoshli G‘olibjon baxshi g‘olib bo‘ldi.
G‘olibjon Oripov Xalqaro baxshichilik san’ati festivali doirasida o‘tkazilgan Respublika ko‘rik tanlovining “Eng yosh baxshichilik san’ati ishtirokchisi” nominatsiyasi g‘olibi bo‘ldi.
***
Surxondaryoda YPX xodimlari bodi-kamera bilan ishlashni boshladi.
Surxondaryolik 80 nafar post-patrul xizmati xodimi, 60 nafar YHXB inspektorlari 8-apreldan boshlab sinov tariqasida raqamli bodi-kameralardan foydalangan holda xizmat olib bormoqda.
Bodi-kameralar maxsus buyurtma asosida Xitoyda ishlab chiqarilgan bo‘lib, quvvati uzluksiz 12 soat ishlashga yetadi, jazirama va yog‘ingarchilik ob-havo sharoitlarida ham qo‘llash mumkin.
***
O‘zbekiston tovar-xomashyo birjasida ilk marta oltin sotildi.
O‘tgan haftada “O‘zRTXB” (Tovar-xomashyo birjasi) AJda oltin quymasi sotuvi bo‘yicha birja savdolari o‘tkazildi. Birjada birinchi oltin xaridori “Olmaliq KMK” AJ bo‘ldi.
***
Qozog‘istonda muddatidan oldin prezidentlik saylovlari o‘tkaziladi.
“Saylov 2019-yilning 9-iyun kuni bo‘lib o‘tadi”, — dedi Qosim-Jomart To‘qayev.
Shuningdek, Darig‘a Nazarboyeva Qozog‘iston prezidenti sayloviga nomzodini qo‘ymasligi haqidagi xabarlarni rad etdi.
Izoh (0)