7-aprel kuni Andijonda ommaviy piyoda yurish aksiyasi o‘tkaziladi
7-aprel, yakshanba kuni Andijon shahrining Amir Temur, Sharof Rashidov va Alisher Navoiy shoh ko‘chalarida Butunjahon salomatlik kuni munosabati bilan 10 ming nafardan ortiq fuqaroning ommaviy piyodalar yurishi o‘tkaziladi. Bu haqda “Daryo” muxbiri xabar berdi.
Tadbirni yuqori saviyada o‘tkazish maqsadida yuqorida qayd etilgan ko‘chalarda avtotransportlar harakatlanishi vaqtincha cheklanadi.
Viloyat hokimligi kotibiyat mudiri Azizbek Mirkomilovning ma’lum qilishicha, joriy yilning 2-aprel kuni Butunjahon salomatlik kuni munosabati bilan o‘tkaziladigan tadbirlarga tayyorgarlik ko‘rish bo‘yicha tasdiqlagan reja-topshirig‘iga asosan tashkil etilayotgan mazkur ommaviy yurishning asosiy maqsadi aholining salomatligini yaxshilash, yoshlarni jismoniy tarbiya va sportga keng jalb etishdan iborat.
Ommaviy yurish doirasida belgilangan hududlarda Andijon davlat tibbiyot instituti professor-o‘qituvchilari va talabalarining innovatsion ishlanmalar yarmarkasi, viloyatda faoliyat olib borayotgan 14 ta yirik dori vositalari va tibbiy buyumlarni ishlab chiqaruvchi korxonalar mahsulotlari ko‘rgazmasi, tibbiy ko‘riklar tashkil etiladi.
Shuningdek, yoshlar ishtirokida “Biz, sog‘lom turmush tarzi tarafdorimiz!” shiori ostida madaniy-ma’rifiy tadbirlar, aksiyalar o‘tkaziladi.
“Viloyat hokimligi, sog‘liqni saqlash boshqarmasi o‘z salomatligini o‘ylaydigan, hayotning qadriga yetadigan insonlarni ushbu ommaviy piyoda yurishga taklif etiladi”, — deyiladi xabarda.
