7 апрель, якшанба куни Андижон шаҳрининг Амир Темур, Шароф Рашидов ва Алишер Навоий шоҳ кўчаларида Бутунжаҳон саломатлик куни муносабати билан 10 минг нафардан ортиқ фуқаронинг оммавий пиёдалар юриши ўтказилади. Бу ҳақда «Дарё» мухбири хабар берди.
Тадбирни юқори савияда ўтказиш мақсадида юқорида қайд этилган кўчаларда автотранспортлар ҳаракатланиши вақтинча чекланади.
Вилоят ҳокимлиги котибият мудири Азизбек Миркомиловнинг маълум қилишича, жорий йилнинг 2 апрель куни Бутунжаҳон саломатлик куни муносабати билан ўтказиладиган тадбирларга тайёргарлик кўриш бўйича тасдиқлаган режа-топшириғига асосан ташкил этилаётган мазкур оммавий юришнинг асосий мақсади аҳолининг саломатлигини яхшилаш, ёшларни жисмоний тарбия ва спортга кенг жалб этишдан иборат.
Оммавий юриш доирасида белгиланган ҳудудларда Андижон давлат тиббиёт институти профессор-ўқитувчилари ва талабаларининг инновацион ишланмалар ярмаркаси, вилоятда фаолият олиб бораётган 14 та йирик дори воситалари ва тиббий буюмларни ишлаб чиқарувчи корхоналар маҳсулотлари кўргазмаси, тиббий кўриклар ташкил этилади.
Шунингдек, ёшлар иштирокида «Биз, соғлом турмуш тарзи тарафдоримиз!» шиори остида маданий-маърифий тадбирлар, акциялар ўтказилади.
«Вилоят ҳокимлиги, соғлиқни сақлаш бошқармаси ўз саломатлигини ўйлайдиган, ҳаётнинг қадрига етадиган инсонларни ушбу оммавий пиёда юришга таклиф этилади», — дейилади хабарда.
Изоҳ (0)