“Daryo” muxbiri aholi murojaatini o‘rganish maqsadida xizmat safari bilan Nishon tumanining “Balxiyak” qishlog‘ida bo‘ldi. Muxbir safari davomida qishloqqa olib boruvchi yo‘l ahvoliga ham e’tibor qaratib, fotokamera obyektiviga tushgan kadrlarni ilindi.
“Balxiyak” qishlog‘iga safarimiz chog‘ida tuman markazidan qariyb 30–35 kilometr narida joylashgan qishloqqa borgunga qadar bo‘lgan yo‘llarning ahvoli juda abgor ekanligi e’tiborimizni tortdi. Va kameramiz obyektivini to‘g‘irlab, birin-ketin suratga ola boshladik.
Nishon-Tallimarjon yo‘lining 15-kilometridan o‘ngga qarab burilgandan so‘ng, qishloqqa qadar bo‘lgan 20 kilometrlik masofaga yo‘lovchi tashuvchi Damas haydovchilar fikri bilan qiziqdik.
— Ikki yildan beri ahvol shu, — deydi Damas haydovchisi Oybek Aliqulov. – Katta yo‘ldan qayrilgandan so‘ng bosib o‘tiladigan 20 kilometrlik masofa juda yomon ahvolga kelib qolgan. Har safar shunchaki qum to‘kib, ta’mirlab ketgandek bo‘lishadi. Ammo ahvol yaxshilanmaydi. Har 3 oyda mashinamizni ta’mirlashga majbur bo‘lyapmiz.
“Balxiyak” qishlog‘iga qatnovchi haydovchilarning aytishicha, ushbu qishloqqa 15 taga yaqin Damas qatnaydi. Yo‘l haqi har bir yo‘lovchi uchun 3500 so‘mni tashkil etadi.
— Ilgari 3000 so‘m bilan qatnar edik, — deydi yana bir haydovchi Abdusodiq Safarov. – Yo‘l haddan ortiq “buzilib ketgani” uchun narxni oshirishga majbur bo‘lyapmiz. Yo‘l talabga javob bermagani bois ham avtomobilimizni ta’mirlash muddati qisqarib bormoqda.
Haydovchilarning aytishicha, yo‘lning ushbu holati yo‘l transport hodisalarning yuzaga kelishiga ham sabab bo‘lmoqda.
— O‘tgan yili inson o‘limi bilan bog‘liq yo‘l-transport hodisasi ro‘y berdi, — deydi Abdusodiq Safarov. – Yo‘lda harakatlanib kelayotgan Nexia chuqurga tushib boshqaruvni yo‘qotgach, yo‘lovchini urib yuborgan. Yo‘lovchi voqea joyida vafot etgan.
“Balxiyak” qishlog‘iga qatnovchi haydovchilarning ma’lumot berishicha, ushbu hududda harakatlanuvchi Damas’larni “Servis senter” MChJga qarashli uyushma nazorat qiladi.
“Balxiyak” qishlog‘iga olib boruvchi yo‘llarning ahvolini ko‘rsatish orqali yo‘l sifati uchun mas’ul bo‘lgan mutasaddilarning holatga e’tibor berishidan umidvormiz. O‘ylaymizki, ushbu qishloqqa olib boruvchi 20 kilometrlik yo‘l ahvoli mutasaddilarni ham tashvishlantiradi. “Daryo” tahririyati ushbu holat bo‘yicha mas’ullar javobini kutib qoladi.
Izoh (0)