«Дарё» мухбири аҳоли мурожаатини ўрганиш мақсадида хизмат сафари билан Нишон туманининг «Балхияк» қишлоғида бўлди. Мухбир сафари давомида қишлоққа олиб борувчи йўл аҳволига ҳам эътибор қаратиб, фотокамера объективига тушган кадрларни илинди.
«Балхияк» қишлоғига сафаримиз чоғида туман марказидан қарийб 30–35 километр нарида жойлашган қишлоққа боргунга қадар бўлган йўлларнинг аҳволи жуда абгор эканлиги эътиборимизни тортди. Ва камерамиз объективини тўғирлаб, бирин-кетин суратга ола бошладик.
Нишон-Таллимаржон йўлининг 15-километридан ўнгга қараб бурилгандан сўнг, қишлоққа қадар бўлган 20 километрлик масофага йўловчи ташувчи Damas ҳайдовчилар фикри билан қизиқдик.
— Икки йилдан бери аҳвол шу, — дейди Damas ҳайдовчиси Ойбек Алиқулов. – Катта йўлдан қайрилгандан сўнг босиб ўтиладиган 20 километрлик масофа жуда ёмон аҳволга келиб қолган. Ҳар сафар шунчаки қум тўкиб, таъмирлаб кетгандек бўлишади. Аммо аҳвол яхшиланмайди. Ҳар 3 ойда машинамизни таъмирлашга мажбур бўляпмиз.
«Балхияк» қишлоғига қатновчи ҳайдовчиларнинг айтишича, ушбу қишлоққа 15 тага яқин Damas қатнайди. Йўл ҳақи ҳар бир йўловчи учун 3500 сўмни ташкил этади.
— Илгари 3000 сўм билан қатнар эдик, — дейди яна бир ҳайдовчи Абдусодиқ Сафаров. – Йўл ҳаддан ортиқ «бузилиб кетгани» учун нархни оширишга мажбур бўляпмиз. Йўл талабга жавоб бермагани боис ҳам автомобилимизни таъмирлаш муддати қисқариб бормоқда.
Ҳайдовчиларнинг айтишича, йўлнинг ушбу ҳолати йўл транспорт ҳодисаларнинг юзага келишига ҳам сабаб бўлмоқда.
— Ўтган йили инсон ўлими билан боғлиқ йўл-транспорт ҳодисаси рўй берди, — дейди Абдусодиқ Сафаров. – Йўлда ҳаракатланиб келаётган Nexia чуқурга тушиб бошқарувни йўқотгач, йўловчини уриб юборган. Йўловчи воқеа жойида вафот этган.
«Балхияк» қишлоғига қатновчи ҳайдовчиларнинг маълумот беришича, ушбу ҳудудда ҳаракатланувчи Damas’ларни Servis senter МЧЖга қарашли уюшма назорат қилади.
«Балхияк» қишлоғига олиб борувчи йўлларнинг аҳволини кўрсатиш орқали йўл сифати учун масъул бўлган мутасаддиларнинг ҳолатга эътибор беришидан умидвормиз. Ўйлаймизки, ушбу қишлоққа олиб борувчи 20 километрлик йўл аҳволи мутасаддиларни ҳам ташвишлантиради. «Дарё» таҳририяти ушбу ҳолат бўйича масъуллар жавобини кутиб қолади.
Изоҳ (0)