O‘zbekiston Respublikasi AKT vazirligi hamda Xorazm viloyati hokimligi tomonidan “Hududlarda axborot texnologiyalari va kommunikatsiyalari sohasini rivojlantirishda mahalliy davlat hokimlik organlari bilan hamkorlik munosabatlari” mavzusida respublika seminari tashkil etildi. Bu haqda AKT vazirligi “Daryo”ga xabar berdi.
Toshkent axborot texnologiyalari universitetining Urganch filialida bo‘lib o‘tayotgan ushbu tadbirda AKT sohasida hududlarda amalga oshirilayotgan loyihalar bilan yaqindan tanishish va tajriba almashish, erishilgan natijalarni tizimdagi korxonalar o‘rtasida keng targ‘ib qilish, soha xodimlarining kasbiy malakasi va bilim darajasini oshirish masalalari ko‘rilmoqda.
Seminarning ochilishida AKT vaziri Shuhrat Sodiqov va Xorazm viloyati hokimi Farhod Ermanov so‘zga chiqqan.
“Keng maqsadlarni ko‘zlagan mazkur seminar viloyat hokimligi bilan birinchi marotaba o‘tkazilmoqda, – dedi Shuhrat Sodiqov. – Seminar o‘zaro tajribalar almashishga, yangi g‘oyalar tug‘ilishiga katta turtki, beradi, deb o‘ylayman. Davlat rahbarining tashabbusiga asosan hududlarda Raqamli texnologiyalari o‘quv markazlari tashkil qilinyapti. Xorazm viloyatida 2019—2020-yillar davomida ana shunday markazlardan 12 ta tashkil etiladi va bu markazlarda 11 mingdan ziyod xorazmlik yoshlar o‘qitiladi, 1061 ta maktabgacha ta’lim, xalq ta’limi va sog‘liqni saqlash muassasalari yuqori tezlikdagi internet tarmog‘iga ulanadi, mazkur maqsadlar uchun qariyb 111 milliard so‘m mablag‘ sarflanishi rejalashtirilgan”.
Xorazm viloyati hokimi Farhod Ermanov viloyatda telekommunikatsiya infratuzilmasini rivojlantirish uchun mahalliy budjetdan 21 milliard so‘m ajratilishini aytgan va AKT bo‘yicha hamkorlik yanada kuchayishiga tilak bildirgan.
Shundan so‘ng, seminar ishtirokchilari TATU Urganch filialidagi ishlar bilan tanishgan. Xususan, AKT vaziri va Xorazm viloyati hokimi ishtirokida filialda sport majmuasi, Axborot texnologiyalari va innovatsiyalar markazi, 200 o‘rinli talabalar oshxonasi ochilgan. Talaba-yoshlar turizm, tibbiyot, tijorat, xavfsiz hudud, “Aqlli uy” singari innovatsion loyihalari taqdimotini o‘tkazgan. Mutaxassislar AT “Aloqabank” bilan hamkorlikda yo‘lga qo‘yilgan asalarchilik faoliyati haqida so‘zlab bergan.
AKT vaziri Shuhrat Sodiqov vazirlik tomonidan TATU Urganch filialining Axborot texnologiyalari va innovatsiyalar markaziga Damas avtomobilini sovg‘a qilgan.
Vazirlik tomonidan Xorazm viloyat xalq ta’limi boshqarmasi bilan hamkorlikda Urganch shahridagi 30-maktabda kompyuter texnologiyalari, robototexnika, kibersport bo‘yicha maxsus to‘garak tashkil etilgan. AKT vaziri va viloyat hokimi mazkur to‘garakda bo‘lib, o‘quvchilar bilan suhbatlashgan, ularga kitoblar sovg‘a qilgan.
Shuningdek, shu kuni Xiva shahrida Raqamli texnologiyalari o‘quv markazi ochilgan. Tadbirda AKT vaziri hamda Xiva shahar hokimi ishtirok etgan. Tadbir ishtirokchilari shahardagi Xiva aloqa tarixi muzeyi faoliyati bilan ham tanishgan.
Ikki kunlik seminar davom etmoqda.
Izoh (0)