Mo‘ynoqda Navro‘z bayrami etnofestival tarzida o‘tkazildi. Bu haqda O‘zA xabar berdi.
Ilk bor o‘tkazilayotgan ushbu tadbirga minglab mahalliy va xorijiy mehmon tashrif buyurdi. Ikki kunlik tadbirning ikkinchi kunida Mo‘ynoqda ertalab oppoq qor yog‘di.
30-mart kuni bayram tadbirlari asosan tuman markazida tashkil qilingan “Hunarmandlar qishlog‘i”da bo‘lib o‘tdi. Bu yerda usta-hunarmandlarning qo‘l mehnatlari, oshpazlar tomonidan tayyorlangan turli xil milliy taomlar ko‘rgazmaga qo‘yilgan. Bayramga bag‘ishlangan savdo yarmarkalarida mahsulotlar arzon narxlarda sotilmoqda. Ko‘rgazmada nashriyotlar tomonidan kitoblar ham sotuvga qo‘yilgan.
“Hunarmandlar qishlog‘i”da baliqchining eski uyi qayta ta’mirlanib uy muzeyiga aylantirilgan. Aynan shu muzey qoshida sayyohlar uchun xostel ham tashkil qilingan. Xorijiy mehmonlarning ushbu xostelda dengiz turmushi bilan yashashiga imkoniyat yaratilgan. Shuningdek, uy muzeyi qoshidagi do‘konda Orol va Mo‘ynoqqa hamda qoraqalpoqlar hayotiga oid har xil suvenirlar sotuvga qo‘yilgani ko‘pchilikni qiziqtirmoqda.
Milliy kuy-qo‘shiqlar sadosi ostida bo‘g‘irsoq, sok-taqan tayyorlandi, sumalak va Navro‘z ko‘ja qaynatildi. Folklor jamoasi tomonidan betashar, sunnat to‘y kabi milliy to‘y-bazmlar ijro etildi. Bir tomonda qoraqalpoq o‘tovini tikish jarayoni yig‘ilganlarga namoyish qilinayotgan bo‘lsa, ikkinchi tomonda milliy bolalar o‘yinlari bo‘yicha musobaqalar qizidi. “Hunarmand” uyushmasi tomonidan milliy kiyimlar modasi namoyishi o‘tkazildi. Uchta joyda arg‘imchoq qurilib, ularda bolalardan tortib yoshi kattalar ham uchib ko‘ngil yozdi.
Kurash musobaqasi ham qizg‘in tus oldi. Mohir dorbozning ko‘zi boylangan holda dor ustiga tortilgan ipda mohirona tomosha ko‘rsatishi katta taassurot uyg‘otdi. Qaldirg‘och, baliq va pushtirang flamingolarning qiyofasidagi varraklar bolajonlarning eng sevimli mashg‘ulotlari bo‘ldi.
Shu kuni Mo‘ynoqda o‘tkazilgan tadbirga Nukus davlat pedagogika institutining filologiya va pedagogika fakultetlaridan 100 nafardan ortiq talaba ham milliy kiyimlarda ishtirok etdi. Ular Mo‘ynoqning e’tiborli joylariga ham sayohat uyushtirdi.
31-mart kuni karvon yurishi va gala konsert bo‘lib o‘tishi kerak edi, lekin Mo‘ynoqda ertalab yoqqan oppoq qor tadbirlarning boshqa kunga qoldirilishiga sabab bo‘ldi.
Mo‘ynoqliklar ko‘pdan buyon bunday yog‘ingarchilikni kuzatmagan edi. Navro‘zda yoqqan qor dengizning qurigan tagiga o‘tqazilgan saksovul ko‘chatlari uchun ayni muddao bo‘ldi. Orolbo‘yida esa bayram davom etadi.
Izoh (0)