Ўзбекистон Республикаси АКТ вазирлиги ҳамда Хоразм вилояти ҳокимлиги томонидан «Ҳудудларда ахборот технологиялари ва коммуникациялари соҳасини ривожлантиришда маҳаллий давлат ҳокимлик органлари билан ҳамкорлик муносабатлари» мавзусида республика семинари ташкил этилди. Бу ҳақда АКТ вазирлиги «Дарё»га хабар берди.
Тошкент ахборот технологиялари университетининг Урганч филиалида бўлиб ўтаётган ушбу тадбирда АКТ соҳасида ҳудудларда амалга оширилаётган лойиҳалар билан яқиндан танишиш ва тажриба алмашиш, эришилган натижаларни тизимдаги корхоналар ўртасида кенг тарғиб қилиш, соҳа ходимларининг касбий малакаси ва билим даражасини ошириш масалалари кўрилмоқда.
Семинарнинг очилишида АКТ вазири Шуҳрат Содиқов ва Хоразм вилояти ҳокими Фарҳод Эрманов сўзга чиққан.
«Кенг мақсадларни кўзлаган мазкур семинар вилоят ҳокимлиги билан биринчи маротаба ўтказилмоқда, – деди Шуҳрат Содиқов. – Семинар ўзаро тажрибалар алмашишга, янги ғоялар туғилишига катта туртки, беради, деб ўйлайман. Давлат раҳбарининг ташаббусига асосан ҳудудларда Рақамли технологиялари ўқув марказлари ташкил қилиняпти. Хоразм вилоятида 2019—2020 йиллар давомида ана шундай марказлардан 12 та ташкил этилади ва бу марказларда 11 мингдан зиёд хоразмлик ёшлар ўқитилади, 1061 та мактабгача таълим, халқ таълими ва соғлиқни сақлаш муассасалари юқори тезликдаги интернет тармоғига уланади, мазкур мақсадлар учун қарийб 111 миллиард сўм маблағ сарфланиши режалаштирилган».
Хоразм вилояти ҳокими Фарҳод Эрманов вилоятда телекоммуникация инфратузилмасини ривожлантириш учун маҳаллий бюджетдан 21 миллиард сўм ажратилишини айтган ва АКТ бўйича ҳамкорлик янада кучайишига тилак билдирган.
Шундан сўнг, семинар иштирокчилари ТАТУ Урганч филиалидаги ишлар билан танишган. Хусусан, АКТ вазири ва Хоразм вилояти ҳокими иштирокида филиалда спорт мажмуаси, Ахборот технологиялари ва инновациялар маркази, 200 ўринли талабалар ошхонаси очилган. Талаба-ёшлар туризм, тиббиёт, тижорат, хавфсиз ҳудуд, «Ақлли уй» сингари инновацион лойиҳалари тақдимотини ўтказган. Мутахассислар АТ «Алоқабанк» билан ҳамкорликда йўлга қўйилган асаларчилик фаолияти ҳақида сўзлаб берган.
АКТ вазири Шуҳрат Содиқов вазирлик томонидан ТАТУ Урганч филиалининг Ахборот технологиялари ва инновациялар марказига Damas автомобилини совға қилган.
Вазирлик томонидан Хоразм вилоят халқ таълими бошқармаси билан ҳамкорликда Урганч шаҳридаги 30-мактабда компьютер технологиялари, робототехника, киберспорт бўйича махсус тўгарак ташкил этилган. АКТ вазири ва вилоят ҳокими мазкур тўгаракда бўлиб, ўқувчилар билан суҳбатлашган, уларга китоблар совға қилган.
Шунингдек, шу куни Хива шаҳрида Рақамли технологиялари ўқув маркази очилган. Тадбирда АКТ вазири ҳамда Хива шаҳар ҳокими иштирок этган. Тадбир иштирокчилари шаҳардаги Хива алоқа тарихи музейи фаолияти билан ҳам танишган.
Икки кунлик семинар давом этмоқда.
Изоҳ (0)