Президент шу йил 19 февраль куни Сирдарё вилоятининг Ховос туманига ташриф буюриб, Ховос шаҳарчасининг бош режаси билан танишиш асносида ижтимоий ҳимояга муҳтож ва ногиронлиги бор хотин-қизларни доимий иш ва уй-жой билан таъминлаш мақсадида вилоятда 32 та тикувчилик мажмуаси ташкил этиш, 4,2 минг нафардан ортиқ аёлни иш билан таъминлаш бўйича топшириқ берганди. Бу ҳақда «Дарё»га «Халқ билан мулоқот» гуруҳи маълум қилди.
Бу лойиҳанинг илк натижаси бўй кўрсатди: Ховос туманининг «Бунёдкор» маҳалласидаги қаровсиз, ташландиқ, шўр босган жойда қисқа муддат — 17 кун ичида энг замонавий технологиялар билан жиҳозланган тикув мажмуаси барпо этилди. Бунинг натижасида маҳалладаги 140 нафар хотин-қиз доимий иш ўрни билан таъминланди.
«Sirdaryo baraka chevarlari» корхонасининг барпо этилиши билан тумандаги иш билан банд бўлмаган хотин-қизларнинг моддий фаровонлиги ошади. Улар имтиёзли ипотека кредити эвазига Ховос ҳудудида қурилаётган турар жойлар билан таъминланади. Аёллар ҳам ишли, ҳам уйли бўлади.
Корхона тўлиқ қувватда ишлай бошлагач, йилига 8 миллион дона тайёр маҳсулот — сочиқлар, болалар ва катталар кийимлари, чойшаблар ишлаб чиқарилади. Маҳсулотнинг 60 фоизи экспортга, қолгани ички бозорга йўналтирилади.
Изоҳ (0)