Blogerlar deputatning taklifiga qarshi. Germaniyadan bir masalada oldinda ekanmiz. Ijtimoiy tarmoqlardagi trendlar
Haftaning birinchi yarmida ijtimoiy tarmoqda ro‘y bergan asosiy voqealar bilan navbatdagi dayjestimizda tanishishingiz mumkin.
Yosh bolali onalar chetga chiqmasin...mi?
Xalq deputatlari Piskent tumani Kengashi deputati Marhabo Qurbonova Oliy Majlis Qonunchilik palatasi deputatlari va Senati a’zolariga voyaga yetmagan farzandlari bo‘lgan onalarning xorijga chiqishini cheklash taklifini bildirdi.
Bu taklif tarmoqda hayrat bilan kutib olindi, deylik, post va izohlar taxminan mana bunday ko‘rinishda:
Skrin: “Daryo”
Skrin: “Daryo”
Bu mavzu haqida fikr so‘rab o‘zbek blogerlariga muroojaat qildik. Demak, yangi ruknimiz — “Bloger fikri”.
Bu, avvalo, inson huquqlariga zid. Qolaversa, muammoning yechimi emas, balki yangi muammolarning boshi bo‘ladi. Umuman, oxirgi paytlarda epataj takliflar bilan og‘izga tushish urf bo‘lyapti. Birov amma-yu tog‘avachchalar orasida nikohni taqiqlash taklifi bilan, yana birov ayollarni yurt qamog‘iga tiqish taklifi bilan og‘izga tushyapti. Bu taklif o‘tmasligini bilishadi, ammo ularni hamma tanib oladi. Xuddi jurnalistlarga qasam ichirishni taklif qilgan jurnal bosh muharriridek.
Men ozod insonning erkin harakatlanishini cheklovchi har qanday qoidalarga qarshiman. Xalqimiz o‘zi propiska, OVIR degan cheklovlarda to‘yib bo‘ldi. Voyaga yetmagan farzandi bor ayollarning chetga chiqishini qonun yo‘li bilan cheklash orqali muammoni yechib bo‘lmaydi. Deputatlar, avvalo, ana shu muammoni yuzaga keltirgan sabablarni bartaraf etishni o‘ylashi kerak.
Davronbek Tojialiyev (O‘zbekistondagi eng katta onlayn kutubxona — “Ziyouz.com” sayti)
Taklifga qo‘shilmayman.
Deylik, ushbu taklifni bergan Marhabo Qurbonovaning voyaga yetmagan farzandlari bor. Konferensiyaga chaqirib qolishdi chet elga. Yoki ishbilarmon ayol, hamkorlari bilan uchrashishi kerak. Yoki davolangani ketmoqchi. Bunday ssenariylarning millionlab shakli bor. Berilgan taklif barchasini inobatga olganmikan?
Negadir bizda nuqul shunaqa. Har qanday muammoning yechimi - cheklov yoki jazo. Ratsional yondashuv yo‘q.
Umid G‘afurov (Telegram’dagi “Troll.uz” kanali asoschisi)
Bu masalaga bir taraflama yondashib bo‘lmaydi. O‘zbekiston sharoitida 3-4 yosh bolani boqish uchun yetarli oylik to‘lovchi ish o‘rinlari kam,bo‘lsa ham egali. Nafaqa to‘lovlari ham juda kulgili ahvolda. Bu qarorni taklif qilganlar yo vaziyatni aniq bilishmaydi, yoki biz ham ishlayapmiz degan g‘oya bilan taklif qilishgan. Bolalarni bog‘chaga 3 yoshdan qabul qilish ham qancha ayollarni qiynadi va qiynab kelmoqda. Deputatlar xalqni qiynaydigan qarorlarni taklif qilishdan tiyilsalar bo‘lardi.
Abdulazizxon Akramov (Telegram’dagi @doridarmonlar kanali asoschisi)
Muammo borligi rost. Ammo taqiqlash orqali maqsadga erishib bo‘lmaydi. Qaytanga kasal battar gazak oladi. Muammoga yechim topish uchun uning oqibati bilan emas, sabablari bilan kurashish kerak aslida.
Jamshid Niyozov (Telegram’dagi Niyozov News kanali asoschisi)
Men bunday cheklovlarga mutlaqo qarshiman. Bunday cheklovlar xalq ovora bo‘lib qiynalishiga sabab bo‘lsa, ikkinchi tarafdan xalqaro maydonda obro‘yimiz tushishiga sabab bo‘ladi. Bunday cheklovlarni joriy qilish emas, aynan shunga o‘xshagan boshqa cheklovlarni ham mutlaqo yo‘qotish kerak. Chunki bunday cheklovlar mamlakat taraqqiyotga xizmat qilmaydi, aksincha, oyog‘imizdan chaladi.
Facebook’ning bir guruhiga qo‘yilgan videorolik ko‘pchilikning hayratiga sabab bo‘ldi. Unda Germaniyaning oddiygina chekka bir joylaridan birida sotuvchisiz asal sotish budkasi tasvirlangan. Budkada 5-6 idishda asal bor, narxi yozib qo‘yilgan, kimga kerak bo‘lsa, tagidagi maxsus teshikka 5 yevro tashlab olib ketaverar ekan. Bu videoni ko‘rib, Germaniya bizdan 70-80 yil “orqada” ekan, deb o‘yladim. Esingizda bo‘lsa, Abdulla Qahhor “O‘tmishdan ertaklar” asarida yaypanlik novvoy ertalab nonlarini ko‘chaga qo‘yib qo‘yishini, kimga non kerak bo‘lsa, nonni olib, savat ustiga pul qo‘yib ketaverishini yozgan edi.
Haqiqatan, o‘tmishdagi ota-bobolarimiz mana shunday insonlar bo‘lgan. Videoni ko‘rib, balki bizda ham eksperiment qilib ko‘rish kerakmikan, deb qoldim shu borada. Ishonch iymonning asosi, deyilganku axir, bir-birimizga ishonaylik.
Facebook’da ko‘tarilgan boshqa mavzularga qisqacha to‘xtalamiz.
Shunday qilib, bu demokratiyami yoki bahorning boshlanishimi. Nima deysizlar, nimasi o‘ziga yarashipti buning?
Odam ajratish demang-u, shunaqalarni ko‘rsam, “bitta satil-chelak kiyib olmapti-da boshiga” degim keladi.
Ma’lumot uchun: bu kabi yuruvchilar ilk marotaba Fransiyada paydo bo‘lgan. Ya’ni, nikohsiz tug‘ilgan va voyaga yetgan o‘smirlar o‘zini tasdiqlovchi hujjat (pasport) ololmagani (undaylarga berilmagan...) uchun shu kabi bir gala yoshlar to‘dasi o‘zining shimlarini va ko‘ylaklarini xuddi shunday yirtib olib, har xil tarang-turung, ochiq-sochiq kiyinib, turli-tuman bachkana bo‘yanib, noodatiy harakatlar qilib namoyish o‘tkazishgan. Maqsadi jamiyatda nikohsiz tug‘ilganlar ham hamma qatori imkoniyatlardan foydalanishga erisha olishi bo‘lgan.
PS: Shunday qilib, mana qanday odamlar buni “moda” qilib yuborgan, kimlardir buni ko‘zga tashlanib turish uchun shunday kiyinib yurishni odat qilmoqda endi...
Facebook’ning “Xalq bilan muloqot” guruhiga qo‘yilgan surat hazil-mutoyiba bilan katta qiziqish uyg‘otdi. Belgini o‘rnatganlar noodatiy tarzda yondashgani ular maqsadiga yetishiga xizmat qilishi aniq, ofarin, g‘oya mualliflari!
Foto: Facebook
* * *
Ertaga Xalqaro-xotin qizlar bayrami. Shu mavzuda Facebook foydalanuvchilaridan biri o‘yga toldiruvchi bir posti 600 ga yaqin like to‘pladi.
Ayollarga ehtirom ularning boyligi, mavqeiga qarab ko‘rsatilmasligi kerak!
Ko‘chalarimizni, shahrimizni ozoda qilayotganlar, aynan ular ko‘prog‘iga loyiq emasmi? Hammamiz uxlab yotgan paytimizda ular ko‘chalarimizni tozalab qo‘yishadi! Nega ular e’tibordan chetda qolishadi har doim?
Haqiqatan, har bir ayol biz uchun azizdir, bayram barcha ayollarniki. Fursatdan foydalanib, barcha ayollarimizni, barcha kasb va sohadagi ayollarimizni bayram bilan tabriklaymiz. Baxtimizga sog‘ bo‘ling, deya bugungi dayjestimizni yakunlaymiz.
Izoh (0)