“Barselona”dan ketma-ket tarsaki yegan “Real Madrid” Chempionlar Ligasidagi yurishini davom ettira oladimi? (prevyu)

Bugun, 5-mart kuni Yevropa Chempionlar Ligasida ilk chorak finalchilar nomi ma’lum bo‘ladi. Jumladan, Madridning “Real” klubi o‘z maydonida Amsterdamning “Ayaks” jamoasini qabul qiladi.

1/8 finalning birinchi uchrashuvida “Qirollik klubi” Karim Benzema va Marko Asensioning gollari sabab 2:1 hisobidagi g‘alabani tantana qilgandi. Shu boisdan ham “Real” javob bellashuvini favorit sifatida boshlaydi. Ammo Santyago Solari shogirdlari favorit ekanligini maydonda isbotlashiga to‘g‘ri keladi. Zero, musobaqaning amaldagi g‘olibi o‘zining azaliy raqibi bo‘lmish “Barselona”ga ketma-ket 2 ta o‘yinda mag‘lub bo‘ldi. Kamiga ikkala mag‘lubiyat  ham “Santyago Bernabeu”da qabul qilib olindi. “Real” Ispaniya Kubogi bilan xayrlashdi, La Ligada esa “Barselona”dan 12 ochkoga ortda qolib ketdi. Madridlik muxlislarning bunday natijadan hafsalasi pir bo‘lgani rost. Shunday ekan, jamoa kurashadigan faqat bitta sovrin — “shalpangquloq”ning o‘zigina qoldi, xolos. Bu yo‘lda jamoa bugun “Ayaks”ga sensatsiya qayd etib, shov-shov ko‘tarmasligi uchun harakat qiladi.

Amsterdam jamoasi esa “Real”dan qabul qilingan mag‘lubiyatlardan so‘ng Niderlandiya chempionatida 2 ta o‘yin o‘tkazdi. Ularning ikkalasida ham yirik hisobda g‘alaba qozondi. 10 ta gol urib, 1 ta gol o‘tkazdi, xolos. Erik ten Hag shogirdlarining milliy birinchilikdagi ishlari raqibinikiga qaraganda chakki emas. Klub musobaqa peshqadami “PSV Eyndxoven”dan (61 ochko) bitta kam o‘yin o‘tkazgan holda 56 ochko bilan jadvalning 2-pog‘onasida bormoqda. “Ayaks”ning “Real” bilan o‘yinda yo‘qotadigan hech narsasi yo‘q. Shu boisda ham Frenki de Yong jamoadoshlari “vabank”ka borishni o‘z oldi maqsad qilgan bo‘lsa ajab emas.

Tarkiblar haqida

“Real”da jamoa sardori Serxio Ramos o‘tgan o‘yindagi kartochkasi sabab UEFA tomonidan musobaqaning 2 ta o‘yinidan chetlatildi. Ramosning yo‘qligi hozirgi “Real”da bilinishi tabiiy hol. Solari uning o‘rnini o‘zining universalligi bilan tanilib ulgurgan Nacho orqali yopishi ham deyarli aniq. Murabbiy bilan arazlashib qolgan Isko o‘yin qaydnomasiga kiritilgan, biroq uning maydonga tushishi ham so‘roq ostida. Markos Lyorente esa hamon jarohati sabab jamoasiga yordam bera olmayapti.

“Ayaks”da esa hammasi joyida. Erik ten Hag jamoasida faqat bitta kichik yo‘qotish bor. Karel Eyting jarohati sabab Madridga kelmagan. Ammo u asosiy tarkibning muqim a’zosi hisoblanmaydi. Amsterdam jamoasi ayni damda o‘zining eng kuchli tarkibi bilan Madridda mo‘jiza ko‘rsatishga harakat qilib ko‘radi.

Uchrashuv hakami

Bellashuvni germaniyalik Feliks Brix boshqarib boradi. Brix janoblari 2018/19-yilgi mavsumda xalqaro maydonda 5 ta o‘yinda xizmat qilishga ulgurdi. U bu bahslarda 28 ta sariq kartochka ko‘rsatishga ulgurdi. Bitta o‘yinda o‘rtacha — 5,6 tadan. Qizil kartochkaga esa atigi 2 marta murojaat qilgan. Bitta o‘yinda o‘rtacha 30 marta qoida buzilishini qayd etgan.

Qiziqarli faktlar:

• “Real” “Ayaks”ni so‘nggi 7 ta o‘yindan beri yutib keladi.
• “Ayaks” 16 yildan beri Chempionlar Ligasi chorak finaliga chiqa olmayapti.
• “Real” 23-marta Chempionlar Ligasi pley-offiga chiqdi. Bu musobaqa tarixidagi rekord hisoblanadi.
• Chempionlar Ligasida ikkala klubning so‘nggi 6 ta bellashuvida jamoalar 2 tadan ko‘proq gol kiritgan.

Murabbiylar fikri

Biz yutishni va keyingi bosqichga chiqishni xohlaymiz. Jamoamizda xarakter va Chempionlar Ligasiga bo‘lgan o‘zgacha mehr bor. Jamoadagi hamma kuchliroq o‘yin ko‘rsatib, ko‘proq hujum qilib, gollar urish uchun mehnat qilmoqda. Bu — bizning ishimiz.Santyago Solari, “Real” bosh murabbiyi

Bizning maqsadimiz aniq. U hech bir o‘yinda o‘zgarmaydi — gollar urish. Biz “Ayaks”miz va bizga kimga qarshi o‘ynashimizning farqi yo‘q. Har doim ustunlik qilib, gollar urishga va g‘alaba qozonishga harakat qilamiz.

Erik ten Hag, “Ayaks” bosh murabbiyi