«Барселона»дан кетма-кет тарсаки еган «Реал Мадрид» Чемпионлар Лигасидаги юришини давом эттира оладими? (превью)

Бугун, 5 март куни Европа Чемпионлар Лигасида илк чорак финалчилар номи маълум бўлади. Жумладан, Мадриднинг «Реал» клуби ўз майдонида Амстердамнинг «Аякс» жамоасини қабул қилади.

1/8 финалнинг биринчи учрашувида «Қироллик клуби» Карим Бензема ва Марко Асенсионинг голлари сабаб 2:1 ҳисобидаги ғалабани тантана қилганди. Шу боисдан ҳам «Реал» жавоб беллашувини фаворит сифатида бошлайди. Аммо Сантьяго Солари шогирдлари фаворит эканлигини майдонда исботлашига тўғри келади. Зеро, мусобақанинг амалдаги ғолиби ўзининг азалий рақиби бўлмиш «Барселона»га кетма-кет 2 та ўйинда мағлуб бўлди. Камига иккала мағлубият  ҳам «Сантьяго Бернабеу»да қабул қилиб олинди. «Реал» Испания Кубоги билан хайрлашди, Ла Лигада эса «Барселона»дан 12 очкога ортда қолиб кетди. Мадридлик мухлисларнинг бундай натижадан ҳафсаласи пир бўлгани рост. Шундай экан, жамоа курашадиган фақат битта соврин — «шалпангқулоқ»нинг ўзигина қолди, холос. Бу йўлда жамоа бугун «Аякс»га сенсация қайд этиб, шов-шов кўтармаслиги учун ҳаракат қилади.

Амстердам жамоаси эса «Реал»дан қабул қилинган мағлубиятлардан сўнг Нидерландия чемпионатида 2 та ўйин ўтказди. Уларнинг иккаласида ҳам йирик ҳисобда ғалаба қозонди. 10 та гол уриб, 1 та гол ўтказди, холос. Эрик тен Ҳаг шогирдларининг миллий биринчиликдаги ишлари рақибиникига қараганда чакки эмас. Клуб мусобақа пешқадами «ПСВ Эйндховен»дан (61 очко) битта кам ўйин ўтказган ҳолда 56 очко билан жадвалнинг 2-поғонасида бормоқда. «Аякс»нинг «Реал» билан ўйинда йўқотадиган ҳеч нарсаси йўқ. Шу боисда ҳам Фрэнки де Йонг жамоадошлари «вабанк»ка боришни ўз олди мақсад қилган бўлса ажаб эмас.

Таркиблар ҳақида

«Реал»да жамоа сардори Серхио Рамос ўтган ўйиндаги карточкаси сабаб УЕФА томонидан мусобақанинг 2 та ўйинидан четлатилди. Рамоснинг йўқлиги ҳозирги «Реал»да билиниши табиий ҳол. Солари унинг ўрнини ўзининг универсаллиги билан танилиб улгурган Начо орқали ёпиши ҳам деярли аниқ. Мураббий билан аразлашиб қолган Иско ўйин қайдномасига киритилган, бироқ унинг майдонга тушиши ҳам сўроқ остида. Маркос Льоренте эса ҳамон жароҳати сабаб жамоасига ёрдам бера олмаяпти.

«Аякс»да эса ҳаммаси жойида. Эрик тен Ҳаг жамоасида фақат битта кичик йўқотиш бор. Карел Эйтинг жароҳати сабаб Мадридга келмаган. Аммо у асосий таркибнинг муқим аъзоси ҳисобланмайди. Амстердам жамоаси айни дамда ўзининг энг кучли таркиби билан Мадридда мўъжиза кўрсатишга ҳаракат қилиб кўради.

Учрашув ҳаками

Беллашувни германиялик Феликс Брих бошқариб боради. Брих жаноблари 2018/19 йилги мавсумда халқаро майдонда 5 та ўйинда хизмат қилишга улгурди. У бу баҳсларда 28 та сариқ карточка кўрсатишга улгурди. Битта ўйинда ўртача — 5,6 тадан. Қизил карточкага эса атиги 2 марта мурожаат қилган. Битта ўйинда ўртача 30 марта қоида бузилишини қайд этган.

Қизиқарли фактлар:

• «Реал» «Аякс»ни сўнгги 7 та ўйиндан бери ютиб келади.
• «Аякс» 16 йилдан бери Чемпионлар Лигаси чорак финалига чиқа олмаяпти.
• «Реал» 23 марта Чемпионлар Лигаси плей-оффига чиқди. Бу мусобақа тарихидаги рекорд ҳисобланади.
• Чемпионлар Лигасида иккала клубнинг сўнгги 6 та беллашувида жамоалар 2 тадан кўпроқ гол киритган.

Мураббийлар фикри

Биз ютишни ва кейинги босқичга чиқишни хоҳлаймиз. Жамоамизда характер ва Чемпионлар Лигасига бўлган ўзгача меҳр бор. Жамоадаги ҳамма кучлироқ ўйин кўрсатиб, кўпроқ ҳужум қилиб, голлар уриш учун меҳнат қилмоқда. Бу — бизнинг ишимиз.Сантьяго Солари, «Реал» бош мураббийи

Бизнинг мақсадимиз аниқ. У ҳеч бир ўйинда ўзгармайди — голлар уриш. Биз «Аякс»миз ва бизга кимга қарши ўйнашимизнинг фарқи йўқ. Ҳар доим устунлик қилиб, голлар уришга ва ғалаба қозонишга ҳаракат қиламиз.

Эрик тен Ҳаг, «Аякс» бош мураббийи