Davlat test markazi direktori Majid Karimovning ma’lum qilishicha, abituriyentlardan OTMga hujjat topshirish uchun yig‘iladigan summaning 80 foizi jarayonga axborot kommunikatsiya texnologiyalarini jalb qilishga sarflanadi. Davlat test markazi direktori bu haqda bugun, 23-fevral kuni O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining press-xolida bo‘lib o‘tgan matbuot anjumanida aytib o‘tdi, deb xabar berdi “Daryo” muxbiri Sevara Nishonova.
Davlat test markazi direktorining ma’lum qilishicha, o‘tgan 2018-o‘quv yilida test sinovlariga axborot kommunikatsiya vositalarini jalb etishga 10 milliard so‘mga yaqin mablag‘ sarflangan. Ularni o‘rnatish va ishga tushirish xarajatlari esa 2 milliard so‘mni tashkil etgan.
“O‘tgan yili ayrim ota-onalar nega aynan mening farzandim o‘tirgan auditoriya onlayn tarzda ko‘rsatilmadi?, deya e’tirozlar bildirgan. Agar test sinovi o‘tkazilayotgan har bitta auditoriya onlayn translyatsiya qilinadigan bo‘lsa, bu katta xarajat degani. Bizda o‘tgan yili 1000 ta guruh shakllantirilgan edi. 1000 ta guruh bu 1000 ta kuzatuv kamerasi degani. Abituriyentlardan yig‘iladigan summaning 80 foizi axborot kommunikatsiyalari vositalarini xarid qilishga sarflanadi.
Qolgan mablag‘ esa binolar ijara to‘loviga yo‘naltiriladi. Birgina misol, o‘tgan yili O‘zekspomarkaz pavilyonining ijara to‘lovi 15 kun uchun ikki milliard so‘mni tashkil etgan. Bizda bunaqa binolardan 57 tasi bor”, — deydi Majid Karimov.
Abituriyentlardan tushgan to‘lovlar test sinovlarini yanada sifatli va qulay sharoitlarda tashkil etish bilan bog‘liq xarajatlarni moliyaviy ta’minlashga yo‘naltirilishi rejalashtirilgan. Ushbu mablag‘lar binolarning ijara to‘loviga, katta quvvatli konditsionerlar, shaxsni aniqlash va kuzatish kamerasi, ota-onalar uchun monitorlar bilan jihozlashga hamda abituriyentlarni ichimlik suvi va ruchka bilan ta’minlashga yo‘naltiriladi.
Shu bilan birga, test sinovlarini tashkil etish qo‘shimcha moliyaviy mablag‘larni talab etadi va abituriyentlardan tushadigan to‘lovlar mavjud xarajatlarni to‘liq qoplash uchun yetarli deb bo‘lmaydi. Ular jumlasiga to‘rt mingdan ortiq guruh nazoratchilariga to‘lanadigan ish haqi, ularga tashkil etiladigan tushlik, test materiallarini sifatli tayyorlash, o‘z vaqtida belgilangan joylarga yetkazib berish, olib kelish, saqlash va shu kabilar kiradi.
Izoh (0)