Давлат тест маркази абитуриентлардан йиғиладиган пул нимага сарфланишига аниқлик киритди

Давлат тест маркази директори Мажид Каримовнинг маълум қилишича, абитуриентлардан ОТМга ҳужжат топшириш учун йиғиладиган сумманинг 80 фоизи жараёнга ахборот коммуникация технологияларини жалб қилишга сарфланади. Давлат тест маркази директори бу ҳақда бугун, 23 февраль куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигининг пресс-холида бўлиб ўтган матбуот анжуманида айтиб ўтди, деб хабар берди «Дарё» мухбири Севара Нишонова.

Давлат тест маркази директорининг маълум қилишича, ўтган 2018-ўқув йилида тест синовларига ахборот коммуникация воситаларини жалб этишга 10 миллиард сўмга яқин маблағ сарфланган. Уларни ўрнатиш ва ишга тушириш харажатлари эса 2 миллиард сўмни ташкил этган.

«Ўтган йили айрим ота-оналар нега айнан менинг фарзандим ўтирган аудитория онлайн тарзда кўрсатилмади?, дея эътирозлар билдирган. Агар тест синови ўтказилаётган ҳар битта аудитория онлайн трансляция қилинадиган бўлса, бу катта харажат дегани. Бизда ўтган йили 1000 та гуруҳ шакллантирилган эди. 1000 та гуруҳ бу 1000 та кузатув камераси дегани. Абитуриентлардан йиғиладиган сумманинг 80 фоизи ахборот коммуникациялари воситаларини харид қилишга сарфланади.

Қолган маблағ эса бинолар ижара тўловига йўналтирилади. Биргина мисол, ўтган йили Ўзекспомарказ павильонининг ижара тўлови 15 кун учун икки миллиард сўмни ташкил этган. Бизда бунақа бинолардан 57 таси бор», — дейди Мажид Каримов.

Абитуриентлардан тушган тўловлар тест синовларини янада сифатли ва қулай шароитларда ташкил этиш билан боғлиқ харажатларни молиявий таъминлашга йўналтирилиши режалаштирилган. Ушбу маблағлар биноларнинг ижара тўловига, катта қувватли кондиционерлар, шахсни аниқлаш ва кузатиш камераси, ота-оналар учун мониторлар билан жиҳозлашга ҳамда абитуриентларни ичимлик суви ва ручка билан таъминлашга йўналтирилади.

Шу билан бирга, тест синовларини ташкил этиш қўшимча молиявий маблағларни талаб этади ва абитуриентлардан тушадиган тўловлар мавжуд харажатларни тўлиқ қоплаш учун етарли деб бўлмайди. Улар жумласига тўрт мингдан ортиқ гуруҳ назоратчиларига тўланадиган иш ҳақи, уларга ташкил этиладиган тушлик, тест материалларини сифатли тайёрлаш, ўз вақтида белгиланган жойларга етказиб бериш, олиб келиш, сақлаш ва шу кабилар киради.