Роналду Мадридда ва у яна Гризманнга қарши. Барчаси «Атлетико М»—«Ювентус» тўқнашуви ҳақида (превью)

Европа Чемпионлар Лигасининг 1/8 финали доирасида бугун сўнгги 2 та ўйин бўлиб ўтади. Улардан бири Мадридда «Атлетико» ҳамда Туриннинг «Ювентус» жамоалари ўртасида кечади. Қуйида учрашувга оид маълумотлар ва қизиқарли фактлар тақдим этилади.

«Атлетико» жорий мавсум ўз майдонида ўтадиган Чемпионлар Лигаси финалида ўйнашни орзу қилмоқда. Аммо тақдир уни 1/8 финалдаёқ Криштиану Роналду етакчилигидаги «Ювентус»га рўбаро қилди. Кўпчилик қуръадан олдин иккала жамоани ҳам мусобақа фаворитлари қаторида кўраётган эди. Бироқ улардан бири мусобақа билан эрта хайрлашишига тўғри келади. Албатта, уларнинг бу босқичда бир-бирига тўғри келгани нейтрал мухлисларга хуш ёққани бор гап. Аммо мазкур ўйин сабаб ғалаба қозонган жамоа ўзига бўлган ишончни янада орттириб олиши ҳам айни ҳақиқат.

Жамоларнинг ўйиндан олдинги ҳолати

Испания Ла Лигасида «Атлетико»нинг ўйини бироз пастлади. Буни натижалар ҳам исботлаб турибди. «Матрасчилар» аввал «Бетис»га сўнгра ҳамшаҳари «Реал»га имкониятни бой берди. Аммо «Ювентус» билан ўйиндан олдин яна ғалабали одимни бошлади. Клуб Антуан Гризманнинг ягона голи эвазига «Райо Вальекано»дан устун келди ва бир тур ўтмай иккинчи ўринни «Жирона»га ютқазиб қўйган «Реал»дан қайтариб олди.

«Ювентус» эса «Атлетико» билан ўйинга қадар Италия Кубогидан чиқиб кетди. А Серияда эса ҳамон якка пешқадам бўлиб турибди. Сўнгги учта ўйинда қуйидаги натижаларни қайд этди: «Парма» билан дуранг, «Сассуоло» ва «Фрозиноне» устидан бир хил — 3:0 ҳисобидаги ғалаба. Жамоа айни дамда бор диққат-эътиборини Чемпионлар Лигасига қаратган. Боиси клуб учун «шалпангқулоқ» кубок сўнгги йиллардаги асосий орзу ва мақсад бўлиб қолмоқда. Шунинг учун ҳам Турин суперклуби Чемпионлар Лигасини ютиш ҳадисини олган Криштиану Роналдуни ўз сафига қўшиб олди. «Ювентус» А Серияни Роналдусиз ҳам у билан ҳам юта олади. Аммо Чемпионлар Лигасига қўлга ҳадеганда етавермагач, «қаҳрамон»—Роналдуга мурожаат этилди. Ронни эса «Реал» билан сўнгги уч йилда «шалпангқулоқ»ни ҳеч кимга бермади. Португалиялик юлдуз ҳам «Ювентус» билан Чемпионлар Лигасини ютиш асосий мақсади эканлигини бот-бот такрорлашдан чарчамаяпти. Шундай экан, «Атлетико»—«Ювентус» қарама-қаршилиги 1/8 финал босқичининг безаги бўлишининг эҳтимоли кам эмас.

• «Атлетико» Чемпионлар Лигасидаги сўнгги учта ўйинда ўз дарвозасидан битта ҳам гол ўтказмади;
• «Атлетико» Чемпионлар Лигасидаги сўнгги ўнта ўйиндан тўққизтасида мағлуб бўлмади;
• «Атлетико» ва «Ювентус» атиги икки марта Чемпионлар Лигасида ўзаро дуч келган. У ҳам бўлса 2014/15 йилги мавсум гуруҳ босқичида. Ўшанда «Атлетико» «Ювентус»ни 1:0 ҳисобида енгган, иккинчи ўйинда эса томонлар голсиз дурангни қайд этган;
• «Ювентус» Чемпионлар Лигасида сўнгги олтита сафар ўйинида мағлуб бўлмади. Турин клуби бешта ўйинда ғалаба қозониб, битта ўйинда дуранг қайд этди.

Учрашув ҳаками

Ўйинни германиялик Феликс Цвайер бошқариб боради. Цвайер 2018/19 йилги мавсумда 6 та халқаро ўйинда ишлаган. У бу беллашувларда 40 та сариқ карточка кўрсатган. Битта ўйинга ўртача — 6,7 тадан. Қизил карточкани эса чўнтагидан чиқаришга ҳожат бўлмаган. Битта ўйинда ўртача 30 та қоида бузилишини қайд этади.  

Тахминий таркиблар

Ўйиндан олдинги фикрлар

Ҳозир устунлик ҳеч кимда эмас. Ҳаммада бир хил имконият — 50 га 50. Одатдагидек жанг қиламиз. Чемпионлар Лигаси ажойиб мусобақа. Унда бизни «Ювентус»га ўхшаган катта жамоаларга қарши ўйинлар кутади. Бундай ўйинлар бизнинг ўсишимизга, ривожланишимизга кўмак беради. Биз ушбу мусобақада иштирок этаётганлигимиздан фахрланамиз.Диего Симеоне, «Атлетико Мадрид» бош мураббийи

Ғалаба қозониш учун кўпроқ меҳнат қилиш керак, шу билан бирга бироз омад ҳам керак. Булар Чемпионлар Лигаси моҳиятини белгилаб бераи. Роналдунинг таркибда борлиги катта устунлик беради. Негаки Криштиану ва Месси Чемпионлар Лигаси мусобақасининг сўнгги 10 йилдаги энг яхши тўпурарлари ҳисобланади. Аммо жамоа ҳам яхши натижа кўрсата олиши керак. Ронни билан бизда ғалабага бўлган имконият кўпроқ, бироқ бу кафолат дегани эмас.

Массимилиано Аллегри, «Ювентус» бош мураббийи