Buxoro shahridagi 21-umumiy o‘rta ta’lim maktabi o‘quvchilari aka-uka Arkadiy Rashidov hamda Sergey Ivanovlar (bolalar va ularning oila a’zolarining ism-shariflari o‘zgartirilgan) aroqxo‘r onasi Marina Ivanova ustidan shikoyat qilib, o‘zlarini Mehribonlik uyiga joylashtirishlarini so‘rab, ichki ishlar organlariga murojaat qilishdi. Bu haqda Buxoro shahar Ichki ishlar organlari faoliyatini muvofiqlashtiruvchi boshqarmasi 3-son IIB huquqbuzarliklar profilaktikasi bo‘limi profilaktika katta inspektori, katta leytenant Shahobiddin Rahmonov ma’lum qildi.
Bildirilishicha, Buxoro shahridagi 38-sonli “Piridastgir” MFYda yashovchi, 1982-yilda tug‘ilgan fuqaro Marina Ivanova opasi Valentina Soliyeva hamda akasi Pyotr Ivanovlar ta’sirida uzoq yillardan buyon spirtli ichimliklar ichib keladi. Qo‘ni-qo‘shnilar, maktab va mahalla faollari, ichki ishlar organlari xodimlari tomonidan nazorat va targ‘ibot ishlari olib borilishiga qaramay, samara bermagan.
“Aka-uka Arkadiy va Sergey uchinchi va to‘rtinchi sinfda tahsil olishadi. Voyaga yetmagan bolalar oilada o‘ta og‘ir, qiyin va sharoitsiz ahvolda yashashadi. Shu boismi, maktabda o‘zlashtirishlari past. Maktabimiz jamoasi tomonidan doimiy ko‘mak beramiz. Ovqatlantiramiz, kiyintiramiz, darsliklaru o‘quv-qurollari bilan ta’minlaymiz. Aqlli, esli-hushli bolalar. Ammo juda odamovi va hurkak. Chunki nosog‘lom oila muhiti ularni ruhan cho‘ktirgan. Deyarli, har kuni oilasidan xabar olamiz. Afsuski, ona ichkilikka ruju qo‘yib bo‘lgan. Uni yo‘ldan qaytara olmadik. Urinishlarimiz zoye ketdi”, — dedi 21-umumiy o‘rta ta’lim maktabi direktori Roza Avdeyeva.
Ota-onalar, maktab jamoasi, profilaktika inspektorlari ko‘p yillardan buyon aka-ukaga yordam qo‘lini cho‘zib kelgan. Mahalla ahli ham bunday ezgulikdan chetda turmagan.
“Eng achinarlisi, bolalarga olib berilgan qishki kiyim-boshlarni ham aroqxo‘r ona sotib, ularni yupun qoldirgan”, — deb so‘zida davom etdi Roza Avdeyeva.
Onasining surunkali ichishi yetmagandek, ular bilan bir xonadonda yashab keladigan tog‘asi hamda xolasi ham bolalar taqdiri bilan qiziqmagan.
“Aroqxo‘r onaning aybi va ehtiyotsizligi bilan bir necha yil oldin ularning xonadonida katta yong‘in sodir bo‘ldi. Ikki xonali uy talofat ko‘rdi. O‘shanda bu xonadonda Arkadiy va Sergeydan tashqari, 2 yoshli Borya hamda 6 yoshli Alisa ham ulg‘ayayotgan edi. Yosh bolalarning hayoti yana xavf ostida qolishi mumkinligini anglab, Vasiylik va homiylik Kengashi hamda huquq-tartibot idoralari bilan hamkorlikda ular Bolalar uyiga joylashtirilgan edi. Afsuski, endi bu ikki nafar farzandining ham taqdiri onani mutlaqo qiziqtirmaydi”, — dedi mahalla fuqarolar yig‘ini raisi Hasan Asadov.
Yarim tunda aroqxo‘r onaning kaltaklashiyu xo‘rlashlaridan bezigan norasida aka-ukalar uydan qochib, IIO FMB 3-son IIB HPBga murojaat qilgan.
“Joriy yilning 10-fevral kuni bolalar oiladagi nosog‘lom hayot tarzidan qiynalishayotganini, o‘zlarini Mehribonlik uyiga joylashtirishlarini so‘rab, murojaat qilishdi. Shu o‘rinda aytib o‘tish joizki, mazkur nosog‘lom oilada bolalar faqatgina onasi Marina Ivanova bilan emas, xolasi Valentina Soliyeva hamda tog‘asi Pyotr Ivanov bilan ham birga yashashadi. Ushbu ikki shaxs sud qaroriga asosan, viloyat Narkologiya dispanseri alkogolizmni majburiy davolash muassasasiga yotqizilgan. Pyotr Ivanov esa turli jinoyatlar sodir etib, bir necha bor jazoni o‘tab qaytgan. Ayni paytda ma’muriy nazoratda. Bunday oila muhitida yashash har qanday o‘smir uchun og‘ir. Bolalar o‘z yaqin qarindoshlarining hamda onasining g‘ayriijtimoiy harakatlari ta’sirida qolmaslik va bunday muhitdan xalos bo‘lish uchun murojaat qilishga majbur bo‘lishgan. Voyaga yetmagan o‘smirlarning ijtimoiy himoya so‘rab kelishganini qanoatlantirish maqsadida amaliy chora belgilashimizga to‘g‘ri keldi. 11-fevral kuni huquq-tartibot idoralari vakillari ishtirokida yopiq sud majlisi o‘tkazildi. Bolalarning onasi Marina Ivanova roziligi hamda arizasiga ko‘ra, o‘g‘illari Arkadiy Rashidov va Sergey Ivanovlar Buxoro viloyat IIB HRB voyaga yetmaganlarga ijtimoiy-huquqiy yordam ko‘rsatish markaziga joylashtirildi”, — dedi Shahobiddin Rahmonov.
Ushbu markazda bir necha kun ijtimoiy-huquqiy yordam ko‘rsatilgan voyaga yetmagan aka-ukalar bilan suhbatlashar ekanmiz, ular bir necha kundan buyon inspektor xodimlari qaramog‘ida nosog‘lom oiladan uzoqda tinch va xavotirsiz yashayotganini bildirdi.
“Uyda hech qachon tinchlik bo‘lmagan. Onam bizni doim uradi, kaltaklaydi. Begona erkaklar uyga kelganda sovuqmi, issiqmi, qaramay, yarim kechasi bo‘lsa ham ko‘chaga haydaydi. Onamga qo‘shilib ichgan xolam va tog‘am ham men va ukamni doimiy baqirib, qo‘rqitishadi. Ular bilan yashashni istamaymiz!”, — dedi Arkadiy ko‘ziga yosh olib.
“Men maza qilib cho‘mildim. Shirinliklar, turli yeguliklar berishdi. Yap-yangi qishki kiyim-bosh va krossovkalar berishdi. Kechqurunlari yotog‘imizga kirib, holimizdan xabar olishadi. Kelajakda men ham inspektor bo‘lib, bolalarga mehribonlik qilaman”, — miyig‘ida kuladi Sergey.
Joriy yilning 15-fevral kuni Buxoro viloyati hokimligi, O‘zbekiston yoshlar ittifoqi viloyat Kengashi hamda OAV vakillari sa’y-harakati bilan Vasiylik va homiylik Kengashi qaroriga ko‘ra, Arkadiy Rashidov va Sergey Ivanovlar Buxoro viloyat IIB HRB voyaga yetmaganlarga ijtimoiy-huquqiy yordam ko‘rsatish markazidan Buxoro shahridagi 32-Mehribonlik uyiga ko‘chirildi.
Bolalar shinam va ozoda xonalarga joylashtirilar ekan, sharoit va imkoniyatlardan mamnun ekanliklarini bildirdi. Ular tahsilni Buxoro shahridagi 8-umumiy o‘rta ta’lim maktabida davom ettirishadi.
Ma’lumot o‘rnida: Buxoro shahrida tug‘ilgan, voyaga yetmagan Arkadiy Rashidov va Sergey Ivanov, shuningdek, onasining loqaydligi va e’tiborsizligi tufayli bugungi kunda Bolalar uyida tarbiyalanayotgan 3 yoshli va 7 yoshli farzandlari Borya va Alisa taqdiriga ham befarq qaragan Marina Ivanovaga nisbatan uning yuqorida ko‘rsatilgan xatti-harakatlariga nisbatan Buxoro shahar Vasiylik va homiylik Kengashi tomonidan uni onalik huquqidan mahrum qilish bo‘yicha hujjatlar to‘planmoqda.
Laylo Hayitova
Izoh (0)