Бухоро шаҳридаги 21-умумий ўрта таълим мактаби ўқувчилари ака-ука Аркадий Рашидов ҳамда Сергей Ивановлар (болалар ва уларнинг оила аъзоларининг исм-шарифлари ўзгартирилган) ароқхўр онаси Марина Иванова устидан шикоят қилиб, ўзларини Меҳрибонлик уйига жойлаштиришларини сўраб, ички ишлар органларига мурожаат қилишди. Бу ҳақда Бухоро шаҳар Ички ишлар органлари фаолиятини мувофиқлаштирувчи бошқармаси 3-сон ИИБ ҳуқуқбузарликлар профилактикаси бўлими профилактика катта инспектори, катта лейтенант Шаҳобиддин Раҳмонов маълум қилди.
Билдирилишича, Бухоро шаҳридаги 38-сонли «Пиридастгир» МФЙда яшовчи, 1982 йилда туғилган фуқаро Марина Иванова опаси Валентина Солиева ҳамда акаси Пётр Ивановлар таъсирида узоқ йиллардан буён спиртли ичимликлар ичиб келади. Қўни-қўшнилар, мактаб ва маҳалла фаоллари, ички ишлар органлари ходимлари томонидан назорат ва тарғибот ишлари олиб борилишига қарамай, самара бермаган.
«Ака-ука Аркадий ва Сергей учинчи ва тўртинчи синфда таҳсил олишади. Вояга етмаган болалар оилада ўта оғир, қийин ва шароитсиз аҳволда яшашади. Шу боисми, мактабда ўзлаштиришлари паст. Мактабимиз жамоаси томонидан доимий кўмак берамиз. Овқатлантирамиз, кийинтирамиз, дарсликлару ўқув-қуроллари билан таъминлаймиз. Ақлли, эсли-ҳушли болалар. Аммо жуда одамови ва ҳуркак. Чунки носоғлом оила муҳити уларни руҳан чўктирган. Деярли, ҳар куни оиласидан хабар оламиз. Афсуски, она ичкиликка ружу қўйиб бўлган. Уни йўлдан қайтара олмадик. Уринишларимиз зое кетди», — деди 21-умумий ўрта таълим мактаби директори Роза Авдеева.
Ота-оналар, мактаб жамоаси, профилактика инспекторлари кўп йиллардан буён ака-укага ёрдам қўлини чўзиб келган. Маҳалла аҳли ҳам бундай эзгуликдан четда турмаган.
«Энг ачинарлиси, болаларга олиб берилган қишки кийим-бошларни ҳам ароқхўр она сотиб, уларни юпун қолдирган», — деб сўзида давом этди Роза Авдеева.
Онасининг сурункали ичиши етмагандек, улар билан бир хонадонда яшаб келадиган тоғаси ҳамда холаси ҳам болалар тақдири билан қизиқмаган.
«Ароқхўр онанинг айби ва эҳтиётсизлиги билан бир неча йил олдин уларнинг хонадонида катта ёнғин содир бўлди. Икки хонали уй талофат кўрди. Ўшанда бу хонадонда Аркадий ва Сергейдан ташқари, 2 ёшли Боря ҳамда 6 ёшли Алиса ҳам улғаяётган эди. Ёш болаларнинг ҳаёти яна хавф остида қолиши мумкинлигини англаб, Васийлик ва ҳомийлик Кенгаши ҳамда ҳуқуқ-тартибот идоралари билан ҳамкорликда улар Болалар уйига жойлаштирилган эди. Афсуски, энди бу икки нафар фарзандининг ҳам тақдири онани мутлақо қизиқтирмайди», — деди маҳалла фуқаролар йиғини раиси Ҳасан Асадов.
Ярим тунда ароқхўр онанинг калтаклашию хўрлашларидан безиган норасида ака-укалар уйдан қочиб, IIО ФМБ 3-сон ИИБ ҲПБга мурожаат қилган.
«Жорий йилнинг 10 февраль куни болалар оиладаги носоғлом ҳаёт тарзидан қийналишаётганини, ўзларини Меҳрибонлик уйига жойлаштиришларини сўраб, мурожаат қилишди. Шу ўринда айтиб ўтиш жоизки, мазкур носоғлом оилада болалар фақатгина онаси Марина Иванова билан эмас, холаси Валентина Солиева ҳамда тоғаси Пётр Иванов билан ҳам бирга яшашади. Ушбу икки шахс суд қарорига асосан, вилоят Наркология диспансери алкоголизмни мажбурий даволаш муассасасига ётқизилган. Пётр Иванов эса турли жиноятлар содир этиб, бир неча бор жазони ўтаб қайтган. Айни пайтда маъмурий назоратда. Бундай оила муҳитида яшаш ҳар қандай ўсмир учун оғир. Болалар ўз яқин қариндошларининг ҳамда онасининг ғайриижтимоий ҳаракатлари таъсирида қолмаслик ва бундай муҳитдан халос бўлиш учун мурожаат қилишга мажбур бўлишган. Вояга етмаган ўсмирларнинг ижтимоий ҳимоя сўраб келишганини қаноатлантириш мақсадида амалий чора белгилашимизга тўғри келди. 11 февраль куни ҳуқуқ-тартибот идоралари вакиллари иштирокида ёпиқ суд мажлиси ўтказилди. Болаларнинг онаси Марина Иванова розилиги ҳамда аризасига кўра, ўғиллари Аркадий Рашидов ва Сергей Ивановлар Бухоро вилоят ИИБ ҲПБ вояга етмаганларга ижтимоий-ҳуқуқий ёрдам кўрсатиш марказига жойлаштирилди», — деди Шаҳобиддин Раҳмонов.
Ушбу марказда бир неча кун ижтимоий-ҳуқуқий ёрдам кўрсатилган вояга етмаган ака-укалар билан суҳбатлашар эканмиз, улар бир неча кундан буён инспектор ходимлари қарамоғида носоғлом оиладан узоқда тинч ва хавотирсиз яшаётганини билдирди.
«Уйда ҳеч қачон тинчлик бўлмаган. Онам бизни доим уради, калтаклайди. Бегона эркаклар уйга келганда совуқми, иссиқми, қарамай, ярим кечаси бўлса ҳам кўчага ҳайдайди. Онамга қўшилиб ичган холам ва тоғам ҳам мен ва укамни доимий бақириб, қўрқитишади. Улар билан яшашни истамаймиз!», — деди Аркадий кўзига ёш олиб.
«Мен маза қилиб чўмилдим. Ширинликлар, турли егуликлар беришди. Яп-янги қишки кийим-бош ва кроссовкалар беришди. Кечқурунлари ётоғимизга кириб, ҳолимиздан хабар олишади. Келажакда мен ҳам инспектор бўлиб, болаларга меҳрибонлик қиламан», — мийиғида кулади Сергей.
Жорий йилнинг 15 февраль куни Бухоро вилояти ҳокимлиги, Ўзбекистон ёшлар иттифоқи вилоят Кенгаши ҳамда ОАВ вакиллари саъй-ҳаракати билан Васийлик ва ҳомийлик Кенгаши қарорига кўра, Аркадий Рашидов ва Сергей Ивановлар Бухоро вилоят ИИБ ҲПБ вояга етмаганларга ижтимоий-ҳуқуқий ёрдам кўрсатиш марказидан Бухоро шаҳридаги 32-Меҳрибонлик уйига кўчирилди.
Болалар шинам ва озода хоналарга жойлаштирилар экан, шароит ва имкониятлардан мамнун эканликларини билдирди. Улар таҳсилни Бухоро шаҳридаги 8-умумий ўрта таълим мактабида давом эттиришади.
Маълумот ўрнида: Бухоро шаҳрида туғилган, вояга етмаган Аркадий Рашидов ва Сергей Иванов, шунингдек, онасининг лоқайдлиги ва эътиборсизлиги туфайли бугунги кунда Болалар уйида тарбияланаётган 3 ёшли ва 7 ёшли фарзандлари Боря ва Алиса тақдирига ҳам бефарқ қараган Марина Ивановага нисбатан унинг юқорида кўрсатилган хатти-ҳаракатларига нисбатан Бухоро шаҳар Васийлик ва ҳомийлик Кенгаши томонидан уни оналик ҳуқуқидан маҳрум қилиш бўйича ҳужжатлар тўпланмоқда.
Лайло Ҳайитова
Изоҳ (0)