Birlashgan Millatlar tashkiloti xalqaro reyting ko‘rsatkichiga ko‘ra, O‘zbekiston 2018-yilda urbanizatsiya darajasi bo‘yicha 233 mamlakat orasida 155-o‘rinni egalladi. Bu haqda O‘zA xabar berdi.
Bugun O‘zbekiston aholisining 50,6 foizi shaharlarda yashaydi.
O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi press-xollida Iqtisodiyot va sanoat hamda Qurilish vazirliklari bilan hamkorlikda o‘tkazilgan matbuot anjumanida ta’kidlanganidek, barqaror rivojlanishning urbanizatsiya jarayonini faollashtirish maqsadida davlat rahbarining 2018-yil 28-dekabrdagi Oliy Majlisga Murojaatnomasida alohida vazifalar belgilangan. Jumladan, mamlakatda urbanizatsiya darajasini 2030-yilgacha 60 foizga yetkazish vazifasi qo‘yilgan.
Prezidentning 2019-yil 10-yanvardagi “Urbanizatsiya jarayonlarini tubdan takomillashtirish chora-tadbirlari to‘g‘risida”gi farmoniga muvofiq, Iqtisodiyot va sanoat vazirligi huzurida Urbanizatsiya agentligi tashkil qilindi.
Mazkur agentlik mamlakatda urbanizatsiyani tartibga solish sohasida yagona davlat siyosatini amalga oshiruvchi tashkilotdir.
Izoh (0)