Yangiyo‘l tumanida Bojxona qo‘mitasi tomonidan tadbirkorlar ishtirokida 2019-yil uchun tovarlar va xizmatlar eksport prognoz ko‘rsatkichlarini bajarishda korxonalarning eksport salohiyatini oshirishga qaratilgan uchrashuv tashkil qilindi. Bu haqda qo‘mita axborot xizmati ma’lum qildi.
Ayrim eksportyorlar tomonidan qonunbuzilish holatlari sodir etilayotgani yig‘ilishda tanqidiy muhokama qilindi. Masalan, Afg‘onistonga qizil loviya eksport qilayotgan tadbirkorlardan biri qoplarning ustini loviya bilan to‘ldirgan holda, ularning ostiga 8 tonna no‘xat joylab yashirincha olib chiqmoqchi bo‘lgan vaqtida to‘xtatib qolindi.
Xorijga eksport qilinayotgan tovarlarning narxini asossiz ravishda tushirish holatlari ham eksport ko‘rsatkichlariga salbiy ta’sir o‘tkazishi mumkin. Masalan, Toshkent viloyatining Angren tumanida 3 dollar 20 sentdan eksport qilingan o‘g‘il bolalar shimi Yangiyo‘lda 2 barobar arzon, ya’ni 1 dollar 62 sentdan eksport qilingan.
Tadbir davomida Bojxona qo‘mitasi rahbariyati respublikaning iqtisodiy salohiyatini oshirishga o‘z hissalarini qo‘shayotgan tadbirkorlarga har tomonlama amaliy yordam berish hamda tovarlar eksporti bojxona rasmiylashtiruvini tun-kun amalga oshirishga tayyor ekanliklarini ma’lum kildi.
Izoh (0)