Toshkent tumanidagi 26-umumiy o‘rta ta’lim maktabida Zahiriddin Muhammad Boburning o‘n uchinchi avlodi — Zayniddin Mavlonov bilan uchrashuv bo‘lib o‘tdi. Bu haqda O‘zA xabarida aytiladi.
— 1956-yilda birinchi sinfga borishim arafasida ota-onam: “Maktabda dadajoning to‘g‘risida so‘rasalar, oddiy ishchi degin, kelib chiqishimiz va bobolaring haqida gapirmagin”, — deb tayinlagan edilar. U vaqtlarda yosh edim. Shajara to‘g‘risida ma’lumotga ega emasdim. Ikkinchi sinfda o‘qiyotganimda sinf devoriga osilgan Bobur Mirzo portretiga ko‘zim tushdi. Bu mening bobojonim deb qichqirdim, quvonganimdan. Axir shunga o‘xshagan portret uyda ham bor edi-da.
Mening otam Nosiriddin Mirzo bo‘lib, 1896-yilda Buxoroda tavallud topgan. Ularning otasi Mirzomuyiddin (Shahzoda Mirxazar) 1852-yilda Dehlida tug‘ilgan. 1857-yilda Hindiston Angliya koloniyasiga aylangach, oxirgi boburiy tojdor Abduzafar Sirojiddin Muhammad Bahodirshoh qamalda qoladi. Shahzoda Mirxazar saroydagilarning bir qismi bilan qochadi.
Biroq, juda ko‘pchilik jazolanadi. Olti yashar shahzoda Mirzo Muyiddinning tarafdorlari yashirincha Hindistonning shimolidagi boburiy podshohlar manzili bo‘lgan Kashmirga olib keladi. 1880-yilda uni ingliz razvedkasi topadi. Ular yetib kelguncha, shahzodani Kashmir — Kobul — Mozori Sharif — Termiz orqali Movarounnahrga olib ketishadi. Shu tariqa Buxoroga kelib qolgan shahzoda Amir Sayid Olimxon xizmatida bo‘lgan, — deya o‘tmish haqidagi xotiralari bilan bo‘lishdi Zayniddin Mavlonov.
Izoh (0)