Buyuk Britaniyaning nufuzli The Guardian gazetasida taniqli jurnalist Kerolayn Idenning “O‘zbekistonga sayohat yo‘riqnomasi: oylik marshrut” sarlavhali maqolasi e’lon qilindi. “Xalq so‘zi Online” ushbu maqolani o‘zbek tiliga tarjima qilib, chop etdi.
Maqolada O‘zbekistonning sayyohlik imkoniyatlari haqida atroflicha ma’lumot berilgan. Quyida ana shu materialning eng muhim qismlari e’tiboringizga havola etiladi.
Nima uchun borish kerak?
“Buxoroning moviy gumbazlari, Qoraqalpog‘iston cho‘llari, Toshkentning betakror metropoliteni, Samarqandning tarixiy ko‘chalari — mana nima uchun O‘zbekiston sayyohlarni jalb qiladi?, — deb yozadi muallif. — Mamlakatning shonli tarixi o‘zbekona mehmondo‘stlik bilan uyg‘unlashib ketgan. Bugungi kunda olib borilayotgan islohotlar natijasida respublikaga sayohat qilish ancha osonlashdi, bu yo‘ldagi byurokratik to‘siqlar bartaraf etildi, ko‘plab tillarda so‘zlashadigan gid-tarjimonlar maktabi shakllantirildi, temir yo‘l, avtomobil va havo yo‘llari takomillashtirildi. Ko‘plab Yevropa davlatlari fuqarolari uchun viza bekor qilindi. Masalan, Buyuk Britaniya fuqarolari 1-fevraldan e’tiboran 30 kun mobaynida O‘zbekistonda vizasiz bo‘lish imkoniyatiga egalar.
Andijondan Nukusgacha...
Mamlakatning qaysi nuqtasiga borish haqida fikr yuritar ekan, Kerolayn Iden sayohatni poytaxt Toshkentdan boshlashni tavsiya etadi. “Shahar markazidagi mahobatli Amir Temur haykalini tomosha qilib, so‘ngra “yer osti mo‘jizasi” — metropoliten bo‘ylab sayr qilish mumkin. Chorsu bozorida rastalarning to‘laligidan boshingiz aylanib qolmasa, quruq mevalar va nonlardan qo‘yningizga siqqanicha oling, chunki bunaqasini boshqa o‘lkada topa olmaysiz.
Keyin Farg‘ona vodiysi tomon yo‘lga tushing. Ipak sanoatining markazi bo‘lmish Marg‘ilon sizni hayratda qoldirishi aniq. Bu yerda ham bozorga kirib, xilma-xil mevalardan oling. Qo‘qonning tarixiy masjidlari, saroylari sizni go‘yo o‘tmishga yetaklaydi. Qo‘qonning holvasidan tatib ko‘rishni unutmang. Rishtonda esa butun dunyoga mashhur kulollar yashaydi. Ularning san’at asarlari jahon muzeylarida namoyish etishga arziydi. Andijonga borib, u yerning qovunlarini yeb ko‘rsangiz, nega Bobur hazratlari Hindistondek ulkan davlatda qudratli saltanatga asos solganiga qaramay, bir umr Andijonni sog‘inib o‘tganini anglab yetasiz.
Toshkentga qaytib, to‘g‘ri Chimyon tog‘lari tomon yo‘l oling. Bu yerda yozda hammayoq gulga, qishda esa qorga burkanadi.
Samarqandni ko‘rmasangiz, O‘zbekistonga bormagan hisoblanasiz. Tezyurar “Afrosiyob” poyezdi sizni ikki soatda u yerga yetkazadi. Samarqandning Registoni-yu ulug‘vor masjid-madrasalari har qanday kishining e’tiborini tortadi.
Keyingi manzil Nurota — bu yerda muqaddas buloqdan suv ichib, Buxoro tomon yo‘lga chiqasiz. Bu shaharni tomosha qilish uchun bir kun yetmaydi, uni anglash va his qilish uchun esa bir umr ham kamlik qiladi.
Buxorodan Urganch hamda Xiva tomon borasiz. Xivaga nega “ochiq osmon ostidagi muzey”, deya ta’rif berishlarini bilasizmi? Chunki bu shahar butunligicha saqlanib qolgan. Bunaqasi dunyo amaliyotida kamdan-kam uchraydi.
Xivadan Nukusga uchib, u yerda dunyoga mashhur Savitskiy muzeyiga kiring. O‘zining tasviriy san’at namunalari bilan Savitskiy muzeyi Luvr muzeyidan kam emas.
O‘zbekistonda transport tizimi rivojlangan. Temir yo‘llar tarmog‘i kengayib, tarixiy shaharlar o‘rtasida yangi yo‘nalishlar hamda tezyurar poyezdlar yo‘lga qo‘yilmoqda. Avtomobil qatnovi esa sizga nihoyatda arzon tushadi.
Butun respublika bo‘ylab mehmonxonalar majmuasi qurilyapti. So‘nggi ikki yilda mamlakatga sayyohlar oqimi keskin ortgani sababli mehmonxonada joyni oldindan band qilib qo‘yganingiz ma’qul.
O‘zbeklar taom tayyorlashni san’at darajasiga olib chiqqan, desak, mubolag‘a bo‘lmaydi. Ayniqsa, milliy taom — palov respublikaning har bir nuqtasida o‘ziga xos usulda tayyorlanishiga qaramay, u hamma joyda birdek mazalidir. Bundan tashqari, osh bu shunchaki taom emas, balki o‘zbek madaniyati va mehmondo‘stligining bir qismidir.
O‘lkaning qaysi nuqtasida bo‘lishingizdan qat’i nazar, ishtahani ochuvchi iforlarni sezasiz. Qozonlarda pishayotgan ovqatlarning mazasi va ko‘rinishining o‘zi sizga o‘zgacha kayfiyat bag‘ishlaydi!”.
Izoh (0)