Majburiy ijro byurosi Andijon viloyati boshqarmasi tomonidan elektr energiyasidan foydalanish qoidalarini buzgan deb topilgan tadbirkorga sud hukmi o‘qildi. Bu haqda jurnalist Umidjon Mamarasulov xabar bermoqda.
Jinoyat ishlari bo‘yicha Andijon tuman sudi raisi Nosirjon Rasulovning ma’lum qilishicha, navbatdagi sud majlisida 2015-yil 28-sentabr kunidan “Xakan qurilish materiallari” MChJ direktori vazifasida ishlab kelgan fuqaro Sh. K.ning ishi ko‘rib chiqilgan.
Sud sudlanuvchi va guvohlarning ko‘rsatuvlarini tinglab, jinoyat ishi hujjatlarini o‘rganib chiqib va ishda mavjud bo‘lgan dalillarga baho berib, quyidagilarni aniqlagan.
Tadbirkor Sh.K. O‘zbekiston Respublikasi Vazirlar Mahkamasining 2018-yil 12-yanvardagi qarori bilan tasdiqlangan “Elektr energiyasidan foydalanish qoidalari”ning 37-bandiga ko‘ra iste’molchi sifatida o‘z tasarrufidagi elektr qurilmalarining texnik holati va xavfsizligi, ularni ekspluatatsiya qilishda xavfsizlik texnikasi qoidalariga rioya etilishi, oqilona foydalanish, iste’molning belgilangan tartiblari bajarilishi va elektr energiyasi sifatining ta’minlanishi, shuningdek MIB va “O‘zdavenergonazorat” inspeksiyasi ko‘rsatmalarining o‘z vaqtida bajarilishi uchun o‘zi javob berishi lozim. Shunga asosan Andijon tuman elektr tarmoqlari korxonasi aksiyadorlik jamiyati bilan tuzilgan Yuridik shaxslar uchun elektr ta’minoti shartnomasida qator talablar belgilangan. Tadbirkor qoida va shartnoma talablarini qo‘pol ravishda buzib, 2017-yilda jamiyatga o‘rnatilgan “Energomera” nomli, “SЕ-303” rusumli uch fazali umumiy foydalanishdagi elektr hisoblagich ko‘rsatkichlarini o‘zgartirish maqsadida hisoblagichga o‘rnatilgan 427952-raqamli nazorat muhriga qasddan shikast yetkazgan. Bu ham yetmaganidek uning xotira bloki va dasturlashdan foydalanishdagi tugmasiga tashqaridan ta’sir ko‘rsatib, 2018-yilning 23-martidan 15-mayga qadar noqonuniy foydalanib kelgan.
Andijon HETK AJ MIB bilan ishlash bo‘limi muhandisi A. Yu.ning suddagi ko‘rsatmasiga ko‘ra, iste’molchilar tomonidan sarflanayotgan elektr energiyasini hisobga olinmay qolgan miqdori va qiymatini qayta hisob-kitob qilish maqsadida jamiyat va tuman ETKlari tarkibida hisob-kitob hay’ati tuzilgani, MIB viloyat boshqarmasining talabnomasiga asosan mazkur MChJ tomonidan elektr energiyasi foydalanish qoidalari buzilgani haqida rasmiylashtirilgan dalolatnoma bo‘yicha hisob-kitob qilinganda dastlab tadbirkor tomonidan 929 million 390 ming 036 so‘mlik moddiy zarar yetkazilgani aniqlangan. Ma’lum muddat o‘tgach taqdim qilingan hujjatlar qayta o‘rganilganda jamiyatga elektr hisoblagich 2017-yil 4-yanvar kuni o‘rnatilgani, qoidabuzarlik haqidagi dalolatnoma 2018-yil 15-may kuni rasmiylashtirilgani aniqlanib, shu kunga qadar mavsumiy ish kunlari, amalga oshirilgan to‘lovlar va tariflar, joyidagi energiya quvvati, ishlash soati 24 soatga qayta hisob-kitob qilinganda 210 million 466 ming 248 so‘m, oxirgi hisob-kitobda esa 117 million 388 ming 728 so‘mlik zarar yetkazilgani aniqlangan va tegishli tartibda undirilgan.
Sudda dastlabki tergov organlari tomonidan qayd etilgan Qonun talablari va mazkur holatlar e’tibordan chetda qoldirilib, jinoyat oqibatida yetkazilgan zararni hisoblashda xatoga yo‘l qo‘yilgani, Andijon viloyat HETK AJ qayta hisob-kitob hay’atining 2019-yil 11-yanvardagi qayta hisob-kitob ma’lumotnomasiga ko‘ra hisobga olinmagan elektr energiya miqdori 57.360 kVt soat, 41 018 783 so‘mni tashkil etgani aniqlangan.
Sudning yakuniy hukmiga ko‘ra, Sh.K. JKning 1852-moddasi 2-qismi bilan aybdor deb topilgan, biroq JKning 70-moddasiga asosan jazodan ozod etilgan. Shuningdek, ATB “O‘zsanoatqurilishbank” Andijon mintaqaviy filialiga o‘tkazilgan 117 million 388 ming 728 so‘mning 41 million 018 ming 783 so‘m miqdori jinoyat oqibatida yetkazilgan zararni qoplash uchun ushbu hisob raqamda olib qolish, qolgan qismi esa MChJ tomonidan kelgusida foydalanadigan elektr energiya hisobiga oldindan haq to‘lash sifatida hisob-kitob qilish belgilandi.
Sud surishtiruv organi tomonidan Qonun talablari qo‘pol ravishda buzilgani, o‘n sutkadan ortiq uzaytirilishi lozim bo‘lgan bir oylik muddatda ham surishtiruv ishlari yakunlanmaganini inobatga olib, qayd etilgan xato va kamchiliklarni oldini olish va bartaraf etish maqsadida xususiy ajrim chiqardi. Unga ko‘ra Majburiy ijro byurosi Andijon viloyat boshqarmasi boshlig‘iga ko‘rsatilgan holatlarni xodimlar o‘rtasida muhokama qilish, tegishli chora-tadbirlar belgilash bo‘yicha o‘z taklifini bildirdi.
Izoh (0)