Namangan viloyat hokimligida soliq tizimidagi islohotlarni amalga oshirish, soliq to‘lovchilarga ko‘maklashish va ular bilan manzilli ishlarni amalga oshirish bo‘yicha hududiy ishchi guruhining seminar-yig‘ilishi bo‘lib o‘tdi. Bu haqda “Daryo”ga viloyat soliq boshqarmasi jamoatchilik bilan aloqalar va huquqiy axborot sho‘basi ma’lum qildi.
Viloyat prokuraturasi, soliq, bank, moliya, iqtisodiyot, statistika, Savdo-sanoat palatasi idoralari rahbarlari hamda kichik biznes va xususiy tadbirkorlik subyektlari vakillari ishtirok etgan tadbirda tadbirkorlik subyektlariga berilayotgan imtiyozlar, 2019-yilda soliq qonunchiligidagi yangiliklar haqida atroflicha tushuncha berildi.
Davlat soliq qo‘mitasi raisi Behzod Musayev, “Mikrokreditbank” ATB boshqaruv raisi Otabek Almardonov va boshqalar mamlakatda kichik biznes va xususiy tadbirkorlikni har tomonlama rivojlantirish, ularning faoliyatini qo‘llab-quvvatlashga qaratilayotgan e’tibor o‘z samarasini berayotganini ta’kidladi.
— 2019-yil 1-yanvaridan ishchi-xizmatchilarning daromad solig‘idagi 4 pog‘onali stavkaning yaxlit 12 foizga tushirilishi, shuningdek, sug‘urta badallarining bekor qilinishi xodimlarning oylik maoshi oshishi, yangidan-yangi ish o‘rinlari yaratilishiga asos bo‘ladi, — deydi Namangan shahridagi “Jahon Javohiri invest” MChJ bosh hisobchisi Feruza Muqimova. — Dastlabki hisob-kitoblarimizga ko‘ra, ishchi-xizmatchilarimizning 2018-yildagi daromad va sug‘urta badallari fondi 73,1 millionga teng bo‘lgan, 2019-yilda esa bu ko‘rsatkich 57,6 million so‘mni tashkil etar ekan. Demak, 15,5 million so‘m davlat budjetiga emas, balki xodimlarimizning cho‘ntagiga tushadi. Daromad yuqori bo‘lgan joyda, albatta ish sifati, unumdorligi oshadi.
2019-yil soliq siyosati konsepsiyasi bilan soliq qonunchiligiga kiritilgan o‘zgarishlarga muvofiq, viloyatda 1 177 ta korxona qo‘shilgan qiymat solig‘ini to‘lash rejimiga o‘tishi, 9 507 ta korxona resurs soliqlari, 196 nafar tadbirkor umumbelgilangan soliqlar, 1886 nafar tadbirkor esa yagona soliq to‘lovchisi sifatida soliq organlarida qayta hisobga olinishi kerak bo‘ladi.
— Mazkur muloqotda qo‘shilgan qiymat solig‘i kichik biznesga ham joriy etilishi natijasida narx-navo oshib ketishining oldini olinishi, tayyor mahsulot ishlab chiqarishgacha bo‘lgan har bir jarayonda yaratilayotgan qo‘shilgan qiymatga soliqlarni joriy etish orqali narxni to‘g‘ri shakllantirish, uning asossiz ravishda oshib ketmasligini ta’minlashdan iborat. Shu maqsadda soliq organlari tomonidan umumbelgilangan soliq to‘loviga o‘tayotgan korxonalarda individual tarzda keng qamrovli tushuntirish ishlari olib borilmoqda, — deydi viloyat soliq boshqarmasi boshlig‘ining o‘rinbosari Adhamjon Mahmudov.
Muloqotda tadbirkorlarni qiziqtirgan savollarga mutaxassislar tomonidan atroflicha javob qaytarildi, zarur huquqiy maslahat berildi. Shu kabi tadbir To‘raqo‘rg‘on tuman hokimligida ham bo‘lib o‘tdi.
Izoh (0)