Наманган вилоят ҳокимлигида солиқ тизимидаги ислоҳотларни амалга ошириш, солиқ тўловчиларга кўмаклашиш ва улар билан манзилли ишларни амалга ошириш бўйича ҳудудий ишчи гуруҳининг семинар-йиғилиши бўлиб ўтди. Бу ҳақда «Дарё»га вилоят солиқ бошқармаси жамоатчилик билан алоқалар ва ҳуқуқий ахборот шўъбаси маълум қилди.
Вилоят прокуратураси, солиқ, банк, молия, иқтисодиёт, статистика, Савдо-саноат палатаси идоралари раҳбарлари ҳамда кичик бизнес ва хусусий тадбиркорлик субъектлари вакиллари иштирок этган тадбирда тадбиркорлик субъектларига берилаётган имтиёзлар, 2019 йилда солиқ қонунчилигидаги янгиликлар ҳақида атрофлича тушунча берилди.
Давлат солиқ қўмитаси раиси Беҳзод Мусаев, «Микрокредитбанк» АТБ бошқарув раиси Отабек Алмардонов ва бошқалар мамлакатда кичик бизнес ва хусусий тадбиркорликни ҳар томонлама ривожлантириш, уларнинг фаолиятини қўллаб-қувватлашга қаратилаётган эътибор ўз самарасини бераётганини таъкидлади.
— 2019 йил 1 январидан ишчи-хизматчиларнинг даромад солиғидаги 4 поғонали ставканинг яхлит 12 фоизга туширилиши, шунингдек, суғурта бадалларининг бекор қилиниши ходимларнинг ойлик маоши ошиши, янгидан-янги иш ўринлари яратилишига асос бўлади, — дейди Наманган шаҳридаги «Жаҳон Жавоҳири инвест» МЧЖ бош ҳисобчиси Феруза Муқимова. — Дастлабки ҳисоб-китобларимизга кўра, ишчи-хизматчиларимизнинг 2018 йилдаги даромад ва суғурта бадаллари фонди 73,1 миллионга тенг бўлган, 2019 йилда эса бу кўрсаткич 57,6 миллион сўмни ташкил этар экан. Демак, 15,5 миллион сўм давлат бюджетига эмас, балки ходимларимизнинг чўнтагига тушади. Даромад юқори бўлган жойда, албатта иш сифати, унумдорлиги ошади.
2019 йил солиқ сиёсати концепцияси билан солиқ қонунчилигига киритилган ўзгаришларга мувофиқ, вилоятда 1 177 та корхона қўшилган қиймат солиғини тўлаш режимига ўтиши, 9 507 та корхона ресурс солиқлари, 196 нафар тадбиркор умумбелгиланган солиқлар, 1886 нафар тадбиркор эса ягона солиқ тўловчиси сифатида солиқ органларида қайта ҳисобга олиниши керак бўлади.
— Мазкур мулоқотда қўшилган қиймат солиғи кичик бизнесга ҳам жорий этилиши натижасида нарх-наво ошиб кетишининг олдини олиниши, тайёр маҳсулот ишлаб чиқаришгача бўлган ҳар бир жараёнда яратилаётган қўшилган қийматга солиқларни жорий этиш орқали нархни тўғри шакллантириш, унинг асоссиз равишда ошиб кетмаслигини таъминлашдан иборат. Шу мақсадда солиқ органлари томонидан умумбелгиланган солиқ тўловига ўтаётган корхоналарда индивидуал тарзда кенг қамровли тушунтириш ишлари олиб борилмоқда, — дейди вилоят солиқ бошқармаси бошлиғининг ўринбосари Адҳамжон Маҳмудов.
Мулоқотда тадбиркорларни қизиқтирган саволларга мутахассислар томонидан атрофлича жавоб қайтарилди, зарур ҳуқуқий маслаҳат берилди. Шу каби тадбир Тўрақўрғон туман ҳокимлигида ҳам бўлиб ўтди.
Изоҳ (0)