«Ўзавтосаноат» раиси ўринбосари Умиджон Салимов мамлакат автомобиль саноати рақобатдан қўрқмаслигини маълум қилди. Бу ҳақда Spot хабар берди.
«Ўзавтосаноат» таркибига кирувчи маҳсулотлар ҳатто импорт автомобилларига божхона тўловлари пасайтирилган тақдирда ҳам рақобатбардош бўлиб қолади.
Бу ҳақда 28 декабрда бўлиб ўтган матбуот анжумани давомида «Ўзавтосаноат» бошқарув раисининг ривожланиш ва маркетинг бўйича ўринбосари Умиджон Салимов маълум қилди.
Маҳсулот рақобатбардошлилигига чегирма ва ўтказилаётган акциялар ҳам ёрдам беради.
«Биз учун энг муҳими — дунёнинг етакчи ишлаб чиқарувчилари қаторида бўлиш. Агар олдин битта автомобилни ишлаб чиқаришга 50 соат вақт сарфланган бўлса (дунё кўрсаткичлари бу борада 22-23 соатни ташкил қилади), ҳозир Асакадаги заводда бу кўрсаткич 25 соатдан ошмайди», — дейди компания вакили.
Автосаноатда янги механизмлар жорий этилмоқда. Масалан ҳозирда корхоналар Just in time тизимида ишламоқда. Бу эса бутловчи қисмлар конвейерга аниқ вақтда етказилади дегани.
Йил бошида компания 170 минг дона енгил автомобиль ишлаб чиқаришни режа қилган бўлса, аҳоли талаби ортиши билан рақам 220 минг донага етказилди. Ўтган йил ишлаб чиқариш кўсаткичи 140 минг дона автомобилни ташкил қилган.
«6 ойда ишлаб чиқариш ҳажмини 50 минг дона автомобилга етказиш жуда мураккаб вазифа. Мавжуд ресурслар, шунингдек KPI каби янги фаолият йўналишлари жорий этилганлиги сабаб буни амалга оширишнинг имкони бўлди. Кейинги йил компания олдига 250 минг дона автомобиль ишлаб чиқаришни мақсад қилди», — дейди Салимов.
«Ўзавтосаноат» йил якунларига бағишланган йиғилишда компания вакиллари корпоратив маданият, ишлаб чиқариш жарёнларининг савдо ва хизмат кўрсатиш билан интеграллашуви, «Кайдзен» фалсафасининг қўлланилиши, бизнес жараёнларининг самарадорлигини ошириш жараёнлари ҳақида сўзлаб берди.
Бундан ташқари SAP тизими жорий этила бошланган бўлиб, бу икки босқичда амалга оширилади. Биринчи босқичда тизим GM Uzbekistan ва дилерлик корхоналарида жорий этилади, иккинчи босқичда — барча бошқа корхоналарда. Бунинг натижасида ишлаб чиқариш самарадорлиги 45 фоизга ошиши кутилмоқда.
«Ўзавтосаноат» кейинги йилда қўшимча хизматларни кўпайтиришни, ягона дарча тизимини яратишни режалаштирмоқда.
Турин политехника университети Инновацион марказининг автобусларга мобил давлат хизматларини кўрсатиш бўйича фаолияти бошланганидан сўнг, автомобилларни тюнинг қилиш бўйича жуда кўп талаблар келиб тушди. Университет ҳозирда вазирлик ва бошқа давлат ташкилотлари учун мобил офисларни яратиш бўйича қиймати 4 миллиард сўм бўлган 40 та лойиҳани тугатди.
Салимовнинг сўзларига кўра, компанияда янги «Қўшимча хизматлар», хусусан автомобиль тюнинги билан шуғулланадиган янги йўналиш яратилади.
«Келгусидаги режалар биринчи навбатда маҳсулот ва кўрсатилаётган хизматлар сифатини яхшилаш, автомобиль таннархини тушириш, харидорларнинг ишончини оқлашдир», — дейди компания вакили.
Изоҳ (0)