27 декабрнинг асосий янгиликлари — «Дарё» дайжестида.
Ўзбекистон Президенти Шавкат Мирзиёев Туркиянинг Turcomoney молиявий-иқтисодий журналининг йиллик рейтингида «Йилнинг хорижий давлат арбоби» деб топилди.
Ўзбекистон раҳбарининг ташқи дунё, хусусан, Туркия ва Марказий Осиё давлатлари билан сиёсий-иқтисодий алоқалар ва ўзаро ҳамкорлик мустаҳкамланишига қўшган салмоқли ҳиссаси эътироф этилди.
Мазкур рейтинг икки асосий («Йилнинг хорижий давлат арбоби» ва «Туркиянинг атоқли давлат арбоби») номинация ва 6 та йўналиш бўйича белгиланади. Коллегиал комиссия ва жюри қарори Туркия ҳамда чет эл сиёсатчилари, бизнес вакиллари фаолиятини ўрганиш ва таҳлил қилиш асосида қабул қилинади. Жюри таркибига журнал экспертлари, Туркия ҳукумати ва парламенти аъзолари, мамлакат минтақалари вакиллари киради.
***
Ўзбекистон Ошпазлар уюшмасида ўзбек миллий нонуштаси стандарти тақдимоти бўлиб ўтди.
Ўзбек миллий нонуштаси стандартига сутли таомлар — ширгуруч, ширқовоқ ва сутли атала, нонларнинг хилма-хил турлари, сомса, қатлама, шунингдек, мева ва сабзавотлар, ширинликлар ва қуруқ мевалар, шу жумладан, асал, мураббо ва сумалак кирди. Стандарт ичимликлардан ширчойни ўз ичига олди.
***
Тошкентда Янги йил байрами арафасида олма дарахти мева солди.
Журналистика ва оммавий коммуникациялар университети ҳовлисидаги олма дарахтлари Янги йил байрами арафасида мева солди.
Маҳалла оқсоқолларига кўра, улар аввал бундай табиат ҳодисасини кузатмаган.
***
Марказий Осиё етакчилари Янги йил байрамини асосан оила даврасида кутиб олади.
Туркманистон президенти Гурбангули Бердимуҳамедов кўп жойларга севимли невараси Керимгули билан боради. Куни кеча Янги йил олдидан уюштирилган тадбирда иштирок этиб, невараси ёзган қўшиқни биргаликда ижро этишди.
Қозоғистон раҳбарининг қизи Дариға Назарбоева сўзларига кўра, Янги йил кечасида оиланинг барча аъзоси бирга йиғилади. Улар Янги йилни кутиб олиш учун президентнинг Олмаотадаги уйига йўл олишади.
Ўзбекистон президенти Шавкат Мирзиёев ўтган йили Янги йилни оила даврасида нишонланганди. Келаётган байрамни қандай кутиб олиши эса ҳозирча маълум эмас.
***
Бугун, 27 декабрь куни Ўзбекистон Президенти Шавкат Мирзиёев Россия президенти Владимир Путин, Туркманистон, Қозоғистон ва Туркия президентлари Гурбангули Бердимуҳамедов, Нурсултон Назарбоев ва Ражаб Тоййиб Эрдўғон билан телефон орқали мулоқот қилди.
Давлатлар раҳбарлари билан алоҳида суҳбатлари чоғида президентлар ўзаро байрам табриклари билан алмашди, шунингдек, ҳамкорликнинг долзарб масалаларини ва кўп жабҳали шериклик истиқболларини кўриб чиқди.
Изоҳ (0)