Хавфсизлик, ҳуқуқни муҳофаза қилиш органлари ва суд ҳокимияти тизими ходимларига берилган солиқ имтиёзлари бекор қилинмоқда. Бу ҳақда Давлат хизматлари агентлиги хабар берди.
Янги қабул қилинган қонунга кўра, 2019 йилнинг 1 январидан солиқ солишдан тўлиқ озод қилинганлар рўйхатидан қуйидаги жисмоний шахслар чиқарилмоқда:
Ўзбекистон Республикаси мудофаа, ички ишлар, фавқулодда вазиятлар вазирликларининг, Давлат хавфсизлик хизматининг ҳарбий хизматчилари, ички ишлар органлари ҳамда божхона органларининг оддий хизматчилари ва бошлиқлари таркибига кирувчи шахслар, шунингдек ўқув ёки синов йиғинларига чақирилган ҳарбий хизматга мажбурлар — хизматни ўташ (хизмат вазифаларини бажариш) муносабати билан олган пул таъминоти, пул мукофотлари ва бошқа тўловлар суммалари бўйича.
Ўзбекистон Республикаси Конституциявий судининг, Ўзбекистон Республикаси Олий суди, фуқаролик ва жиноят ишлари бўйича судлар, иқтисодий, маъмурий ва ҳарбий судлар судьялари, шунингдек прокуратура органларининг мансаб даражаларига эга бўлган ходимлари — уларнинг хизмат вазифаларини бажариши муносабати билан олган даромадлари ҳам энди тўлиқ солиққа тортилади.
Изоҳ (0)