Farg‘onada avtomobillarga gaz to‘ldirish shoxobchasi oldida qarovsiz qoldirilgan Spark o‘g‘irlab ketildi. Bu haqda “Daryo” muxbiri Azizjon Ermatov xabar berdi.
22-dekabr kuni O‘zbekiston tumani Sulaymon qishlog‘ida yashovchi, 1990-yilda tug‘ilgan taksi haydovchisi T.J. Uchko‘prik tumani IIBga ariza bilan murojaat qilgan. Unga ko‘ra, shu kuni soat 20:40 larda Uchko‘prik tumani Yoyilma qishlog‘ida joylashgan avtomobillarga gaz to‘ldirish shoxobchasiga boshqaruvidagi Spark avtomashinasida kelgan. T.J mashinasini ochiq holda yo‘l chetida qoldirib, navbatni bilish uchun ichkariga kirib ketgan. Taxminan 3-4 daqiqada avtomashinani noma’lum shaxs olib qochib ketgani ma’lum bo‘lgan. Holat yuzasidan viloyat hududida “To‘sib ushlash” tadbiri e’lon qilingan.
23-dekabr kuni IIB xodimlari tomonidan olib borilgan surishtiruv ishlari natijasida ushbu avtomashina Uchko‘prik tumani Qo‘qonboy qishlog‘i hududida ushlangan. Jinoyat Uchko‘prik tumani Qorako‘l qishlog‘ida yashovchi, 1999-yilda tug‘ilgan Q.A. tomonidan sodir etilgani aniqlangan.
Hozirda holat yuzasidan surishtiruv ishlari olib borilmoqda.
Izoh (0)