Nurota tuman sudi raisi Zafar Ibragimovning xabar berishicha, Navoiy viloyati Nurota tumanida yashovchi “Jasorat” klubiga biriktirilgan 23 yoshli yigit yana jinoyatga qo‘l urgan. Jinoyatni to‘rtinchi marotaba sodir etgani uchun Sh.M. 11-dekabr kuni “Shahriston” MFYda o‘tkazilgan Nurota tumanining ochiq sud majlisida Jinoyat kodeksining 169-moddasi (o‘g‘rilik) 3-qismi bilan, ya’ni 5 yil-u 3 oy ozodlikdan mahrum etildi. Bu haqda Turon24 xabar bermoqda.
Aniqlanishicha, Sh.M. joriy yilning 2-noyabr kuni qo‘shnisining uyiga yashirincha kirib, uning sandig‘idan 2 mln so‘m pul mablag‘ini o‘g‘irlagan.
“Sh.M. 2015-yilning 21-avgust kuni birinchi marta o‘g‘rilik qilgan. O‘sha yilning 10-oktabr sanasida sud jarayonlari yakunlangach, 2 kun o‘tib 22-oktabrda yana o‘g‘rilikka qo‘l urgan. Unga har ikkala holatdan keyin ham axloq tuzatish jazosi tayinlangan edi. Biroq 2017-yilning 2-noyabr kuni uchinchi marta o‘g‘rilik sodir etgani uchun unga 4 yil-u 2 oy muddatga ozodlikdan mahrum etish jazosi qo‘llanilgan”, — deydi Zafar Ibragimov.
Uchinchi marta jinoyat sodir etgandan so‘ng Sh.M.ni Yoshlar ittifoqi Nurota tuman kengashining kafilligi asosida shartli ravishda ozodlikka chiqarilib, “Jasorat” klubiga biriktirilgan.
Jinoiy ishlar bo‘yicha Nurota tuman sudi tomonidan taqdim etilgan ma’lumotda Sh.M. Nurota tumanida “Jasorat” klubining sardori sifatida faoliyat yuritgani ko‘rsatib o‘tilgan. Ammo Yoshlar ittifoqi Nurota tuman kengashi yetakchisi yetakchi mutaxassisi Sa’dulla Botirov bu ma’lumotni inkor etdi.
“Sh. M. “Jasorat” klubining a’zosi emas. Uning kafilligini olganimiz uchun yolg‘iz yurmasin, deb klubdagi yigitlarga biriktirib qo‘ygan edik. Onasi tuman tibbiyot birlashmasi xodimi, “Do‘stlik” ordeni sohibi. Aslida onasining iltimosi va mahallasining tavsiyasi bilan uning kafilligini olgandik, – deydi Sa’dulla Botirov. – U 3-4 oy o‘zini yaxshi tutdi. Klubga qatnab yurgan paytda eski dardi qo‘zib, “Nuroniy” jamg‘armasini tuman bo‘limida ishlaydigan xodimlardan birining plastik kartasidagi pullarni noqonuniy o‘zlashtirgandan keyin aloqalar uzildi. Biz bu haqda tuman IIBga va “Shahriston” mahallasiga ma’lum qilganmiz. U oxirgi marta 2018-yilning may oyida “Jasorat” klubiga kelgan”.
Sh.M. bolaligida otasi vafot etgan. U onasi, akasi va singlisi bilan yashaydi. Onasi, akasi ishlaydi, o‘zi ham ustachilik bilan shug‘ullanadi. Oilada o‘g‘irlik qilishga sabab bo‘ladigan iqtisodiy tanglik holati kuzatilmagan.
Izoh (0)