Нурота туман суди раиси Зафар Ибрагимовнинг хабар беришича, Навоий вилояти Нурота туманида яшовчи «Жасорат» клубига бириктирилган 23 ёшли йигит яна жиноятга қўл урган. Жиноятни тўртинчи маротаба содир этгани учун Ш.М. 11 декабрь куни «Шаҳристон» МФЙда ўтказилган Нурота туманининг очиқ суд мажлисида Жиноят кодексининг 169-моддаси (ўғрилик) 3-қисми билан, яъни 5 йил-у 3 ой озодликдан маҳрум этилди. Бу ҳақда Turon24 хабар бермоқда.
Аниқланишича, Ш.М. жорий йилнинг 2 ноябрь куни қўшнисининг уйига яширинча кириб, унинг сандиғидан 2 млн сўм пул маблағини ўғирлаган.
«Ш.М. 2015 йилнинг 21 август куни биринчи марта ўғрилик қилган. Ўша йилнинг 10 октябрь санасида суд жараёнлари якунлангач, 2 кун ўтиб 22 октябрда яна ўғриликка қўл урган. Унга ҳар иккала ҳолатдан кейин ҳам ахлоқ тузатиш жазоси тайинланган эди. Бироқ 2017 йилнинг 2 ноябрь куни учинчи марта ўғрилик содир этгани учун унга 4 йил-у 2 ой муддатга озодликдан маҳрум этиш жазоси қўлланилган», — дейди Зафар Ибрагимов.
Учинчи марта жиноят содир этгандан сўнг Ш.М.ни Ёшлар иттифоқи Нурота туман кенгашининг кафиллиги асосида шартли равишда озодликка чиқарилиб, «Жасорат» клубига бириктирилган.
Жиноий ишлар бўйича Нурота туман суди томонидан тақдим этилган маълумотда Ш.М. Нурота туманида «Жасорат» клубининг сардори сифатида фаолият юритгани кўрсатиб ўтилган. Аммо Ёшлар иттифоқи Нурота туман кенгаши етакчиси етакчи мутахассиси Саъдулла Ботиров бу маълумотни инкор этди.
«Ш. М. «Жасорат» клубининг аъзоси эмас. Унинг кафиллигини олганимиз учун ёлғиз юрмасин, деб клубдаги йигитларга бириктириб қўйган эдик. Онаси туман тиббиёт бирлашмаси ходими, «Дўстлик» ордени соҳиби. Аслида онасининг илтимоси ва маҳалласининг тавсияси билан унинг кафиллигини олгандик, – дейди Саъдулла Ботиров. – У 3-4 ой ўзини яхши тутди. Клубга қатнаб юрган пайтда эски дарди қўзиб, «Нуроний» жамғармасини туман бўлимида ишлайдиган ходимлардан бирининг пластик картасидаги пулларни ноқонуний ўзлаштиргандан кейин алоқалар узилди. Биз бу ҳақда туман ИИБга ва «Шаҳристон» маҳалласига маълум қилганмиз. У охирги марта 2018 йилнинг май ойида «Жасорат» клубига келган».
Ш.М. болалигида отаси вафот этган. У онаси, акаси ва синглиси билан яшайди. Онаси, акаси ишлайди, ўзи ҳам устачилик билан шуғулланади. Оилада ўғирлик қилишга сабаб бўладиган иқтисодий танглик ҳолати кузатилмаган.
Изоҳ (0)