21-dekabr kuni Farg‘ona viloyati Marg‘ilon shahridagi Mudofaa vazirligining Toifalangan obyektlarni qo‘riqlash qo‘mondonligiga qarashli harbiy qismlardan birida 10 nafar ko‘ngilli o‘quvchi-yoshlar bir kun davomida xuddi harbiylardek hayot kechirdi. Bu haqda vazirlik matbuot xizmati xabar berdi.
“Vatanparvarlik oyligi” doirasida tashkil etilgan “Armiyadagi bir kunim” aksiyasi yoshlarda harbiy xizmatga bo‘lgan tushunchani shakllantirish, Vatan himoyachisi kasbi mashaqqatlardan iborat ekanini yaqindan tanishtirish maqsadida o‘tkazildi. Shuningdek, maktab o‘quvchilari Vatan tinchligi yo‘lida xizmat qilishning o‘ziga yarasha mushkul sinovlarida o‘zlarini sinab ko‘rdi.
Xususan, bir kun davom etgan mashg‘ulotlarda yoshlar harbiycha hayot bilan tanishib, saf tayyorgarligi, o‘q otish, ekstremal sharoitlarda yashovchanlikni ta’minlash, qurollarni noto‘liq qismlarga ajratish va yig‘ish, jismoniy tayyorgarlik kabi mashqlarda bevosita ishtirok etdi.
Mudofaa vazirligi qo‘shinlarida joriy yildan boshlab birinchi marta o‘tkazilayotgan ushbu tadbirlar yoshlar tomonidan sodir etilayotgan turli huquqbuzarlik va jinoyatlarning oldini olishga, ularda vatanparvarlik ruhini kuchaytirish, ma’naviyatini boyitish, el-yurt xizmatiga doimo tayyor farzand sifatida tarbiyalashga qaratilgan.
Izoh (0)