21 декабрь куни Фарғона вилояти Марғилон шаҳридаги Мудофаа вазирлигининг Тоифаланган объектларни қўриқлаш қўмондонлигига қарашли ҳарбий қисмлардан бирида 10 нафар кўнгилли ўқувчи-ёшлар бир кун давомида худди ҳарбийлардек ҳаёт кечирди. Бу ҳақда вазирлик матбуот хизмати хабар берди.
«Ватанпарварлик ойлиги» доирасида ташкил этилган «Армиядаги бир куним» акцияси ёшларда ҳарбий хизматга бўлган тушунчани шакллантириш, Ватан ҳимоячиси касби машаққатлардан иборат эканини яқиндан таништириш мақсадида ўтказилди. Шунингдек, мактаб ўқувчилари Ватан тинчлиги йўлида хизмат қилишнинг ўзига яраша мушкул синовларида ўзларини синаб кўрди.
Хусусан, бир кун давом этган машғулотларда ёшлар ҳарбийча ҳаёт билан танишиб, саф тайёргарлиги, ўқ отиш, экстремал шароитларда яшовчанликни таъминлаш, қуролларни нотўлиқ қисмларга ажратиш ва йиғиш, жисмоний тайёргарлик каби машқларда бевосита иштирок этди.
Мудофаа вазирлиги қўшинларида жорий йилдан бошлаб биринчи марта ўтказилаётган ушбу тадбирлар ёшлар томонидан содир этилаётган турли ҳуқуқбузарлик ва жиноятларнинг олдини олишга, уларда ватанпарварлик руҳини кучайтириш, маънавиятини бойитиш, эл-юрт хизматига доимо тайёр фарзанд сифатида тарбиялашга қаратилган.
Изоҳ (0)