O‘zbekistonning birinchi to‘qimachilik elektron savdo platformasi taqdimoti bo‘lib o‘tdi. Bu haqda O‘zA xabar bermoqda.
Tadbirda O‘zbekiston to‘qimachilik sanoatining bugungi holati va rivojlanish istiqbollari, eksport salohiyatini oshirish, elektron tijorat sohasidagi munosabatlarni huquqiy tartibga solish tizimi, to‘qimachilik va tikuvchilik sanoati sohasida raqamli texnologiyalar, moda sanoatidagi tendensiyalar muhokama qilindi.
Anjumanda elektron savdo platformasining yaratuvchilari yangi xizmat taqdimotini o‘tkazdi.
— To‘qimachilik sohasida o‘n ikki yildan buyon faoliyat olib boraman, – deydi elektron savdo platformasi asoschilaridan biri Shohrux Qayumov. — Bugun taqdimoti o‘tkazilayotgan platforma sohaga kirib kelayotgan tadbirkorlarga yanada qulaylik yaratish maqsadida yaratilgan. Biz kelgusida faqat mamlakat miqyosida emas, balki xalqaro bozorda ham o‘z o‘rnimizga ega bo‘lishni ko‘zlaganmiz.
Taqdimotda aytilishicha, onlayn-platforma foydalanuvchisi bir vaqtning o‘zida bir necha yetkazib beruvchiga bir urinish bilan savdo takliflarini yuborishi mumkin. Dastlabki bosqichda onlayn platforma bepul ishlaydi. Kelajakda ishlab chiqaruvchilarning xizmatdan foydalanganliklari uchun to‘lov tizimini joriy etish rejalashtirilmoqda.
Izoh (0)