Ўзбекистоннинг биринчи тўқимачилик электрон савдо платформаси тақдимоти бўлиб ўтди. Бу ҳақда ЎзА хабар бермоқда.
Тадбирда Ўзбекистон тўқимачилик саноатининг бугунги ҳолати ва ривожланиш истиқболлари, экспорт салоҳиятини ошириш, электрон тижорат соҳасидаги муносабатларни ҳуқуқий тартибга солиш тизими, тўқимачилик ва тикувчилик саноати соҳасида рақамли технологиялар, мода саноатидаги тенденциялар муҳокама қилинди.
Анжуманда электрон савдо платформасининг яратувчилари янги хизмат тақдимотини ўтказди.
— Тўқимачилик соҳасида ўн икки йилдан буён фаолият олиб бораман, – дейди электрон савдо платформаси асосчиларидан бири Шоҳрух Қаюмов. — Бугун тақдимоти ўтказилаётган платформа соҳага кириб келаётган тадбиркорларга янада қулайлик яратиш мақсадида яратилган. Биз келгусида фақат мамлакат миқёсида эмас, балки халқаро бозорда ҳам ўз ўрнимизга эга бўлишни кўзлаганмиз.
Тақдимотда айтилишича, онлайн-платформа фойдаланувчиси бир вақтнинг ўзида бир неча етказиб берувчига бир уриниш билан савдо таклифларини юбориши мумкин. Дастлабки босқичда онлайн платформа бепул ишлайди. Келажакда ишлаб чиқарувчиларнинг хизматдан фойдаланганликлари учун тўлов тизимини жорий этиш режалаштирилмоқда.
Изоҳ (0)