Avval xabar berilganidek, 14-dekabr kuni chamasi soat 10.00larda Namangan shahrida portlashga o‘xshagan qattiq gumburlash ovozi eshitilgan. Bu haqda O‘zA ma’lum qildi.
Bu ovoz nafaqat Namangan shahri, balki ayrim tumanlarda ham eshitilgani va bundan ko‘pchilik tashvishga tushib qolganligi haqidagi xabarlar turli ijtimoiy tarmoqlarda ham muhokamalarga sabab bo‘ldi. E’tiborlisi, bu holat birinchi marta kuzatilgani yo‘q.
Vaziyatga aniqlik kiritish maqsadida O‘zA muxbiri Favqulodda vaziyatlar vazirligi Seysmoprognostik monitoring Respublika markazi boshlig‘ining birinchi o‘rinbosari Saydullo Nabiyev bilan bog‘landi.
— Namangandagi holat yuzasidan markazimiz, qolaversa, shaxsan o‘zim surishtiruv ishlari olib bordim. Shuni aytish kerakki, 14-dekabr kuni soat 10.00larda va undan keyin ham idoramizga yer qimirlashi, ya’ni zilzila sodir bo‘lganligini bildiruvchi hech qanday signal kelib tushmagan. Ushbu masala yuzasidan FVV Namangan viloyati boshqarmasi boshlig‘i bilan ham bog‘landim. Ma’lum bo‘lishicha, o‘sha kuni boshqarmaga hech bir kishi gumburlash holatidan jabrlangani yoki jiddiy ziyon ko‘rganligi haqida shikoyat yoki ariza kelib tushmagan. Qolaversa, vaziyatga oydinlik kiritish maqsadida O‘zgidrometrologiya markazi bilan bog‘landim. Ularga ko‘ra, gumburlash holati kuzatilgach Namangan viloyati osmonida ob-havo o‘zgarishi yoki shunga o‘xshash holat sodir bo‘lmagan.
Izoh (0)