Vazirlar Mahkamasining 2018-yil 5-dekabrda qabul qilingan “2018—2022-yillarda O‘zbekiston Respublikasida yo‘l harakati xavfsizligini ta’minlash konsepsiyasini amalga oshirish bo‘yicha qo‘shimcha chora-tadbirlar to‘g‘risida”gi qarori bilan yo‘l harakati xavfsizligini ta’minlash va zamonaviy yo‘l infratuzilmasini yaratish borasida davlat-xususiy sheriklikning yangi mexanizmi tasdiqlandi. Bu haqda O‘zA xabar berdi.
Hujjatda hamkorlik qilish mumkin bo‘lgan bir nechta ustuvor yo‘nalishlar bayon etilgan. Xususan, avtomobil yo‘llarida to‘lovga oid qoidabuzarliklarni qayd etib boradigan avtomatlar va axborot tizimlariga ega pullik avtomobil saqlash joylarini tashkillashtirish shular jumlasidan. Endilikda tadbirkorlar bunday hududlarni 10 yil muddatga ijaraga olishlari mumkin. Bu kabi xizmatlarni ko‘rsatadigan kompaniyalar tanlov asosida saralab olinadi. Bu jarayonda davlat faqatgina xususiy sherik tomonidan kelishuv shartlarining bajarilishini monitoring qilish bilan shug‘ullanadi, xolos.
Shuningdek, hujjatda yana bir hamkorlik ko‘zda tutilganki, unga ko‘ra, mahalliy davlat hokimiyati organlari tasarrufida bo‘lgan, jumladan, bozorlar va savdo markazlari hududida joylashgan maydonlarda axborot tizimlariga ega zamonaviy pullik avtomobil to‘xtash joylari quriladi.
Pullik avtomobil saqlash va to‘xtash joylaridan tushgan mablag‘ning bir qismi mahalliy byudjetga yo‘naltiriladi. Bu pullar keyinchalik yo‘l infratuzilmasini rivojlantirishga sarflanadi. Tadbirkorlarni bu yo‘nalishdagi biznesni rivojlantirishga qiziqtirish va investitsiyalar jalb etish uchun imtiyozlar ko‘zda tutilgan.
Xususan, bunday sarmoyadorlar 2022-yil 1-yanvardan boshlab uskunalar, butlovchi buyumlar, dasturiy ta’minot, qurilish va O‘zbekistonda ishlab chiqarilmaydigan boshqa materiallarni belgilangan tartibda tasdiqlangan ro‘yxat bo‘yicha mamlakatimiz hududiga olib kirayotganda bojxona to‘lovlari to‘lashdan (bojxona yig‘imlari bundan mustasno) ozod etiladi. Bundan tashqari, ular O‘zbekiston rezidentlari bo‘lmaganlar tomonidan bajarilgan ish va xizmatlar uchun qo‘shimcha qiymat solig‘i to‘lamaydi.
Hujjatda, shuningdek, yo‘l harakati xavfsizligini ta’minlash va zamonaviy yo‘l infratuzilmasini yaratish sohasida davlat-xususiy sherikligini amalga oshirish tartibi to‘g‘risida vaqtinchalik nizom ham tasdiqlangan.
Izoh (0)