Bugungi kunda O‘zbekistonda 314 nafar talaba baliqchilik yo‘nalishida tahsil olmoqda. Ularning 156 nafari Toshkent davlat agrar universiteti talabalaridir. Bu haqda universitet baliqchilik kafedrasi mudiri Boymat Qahramonov ma’lum qildi, deya xabar beradi O‘zA.
—O‘tgan o‘quv yilida chorvachilik, asalarichilik, baliqchilik sohalari bitta kafedra sifatida faoliyat yuritgan bo‘lsa, joriy yildan baliqchilik sohasida ilmiy faoliyat yuritayotgan malakali kadrlar alohida kafedraga jamlandi. Mazkur kafedraning ilmiy salohiyati 70 foizni tashkil qiladi. Talabalarga baliqchilik sohasida ilmiy darajaga ega olimlar, tajribali tarmoq mutaxassislari va yosh o‘qituvchilardan iborat ilmiy jamoa saboq bermoqda. Astraxan davlat texnika universiteti bilan hamkorlikda baliqchilik sohasi mutaxassislarini tayyorlash bo‘yicha shartnoma imzolangan, — deydi Boymat Qahramonov.
Talabalarga nazariy bilimlardan tashqari baliqchilik xo‘jaliklari bilan hamkorlik shartnomalari tuzilib, maxsus amaliyotlar tashkil qilinmoqda. Iqtidorli talabalarning xorijda ta’lim olishlari uchun ham qo‘shimcha grant dasturlari mavjud.
Izoh (0)