Uzinfocom domenlarni ro‘yxatga olish bo‘yicha faoliyatini yakunladi

Davlat axborot tizimlarini yaratish va qo‘llab-quvvatlash bo‘yicha yagona integrator Uzinfocom o‘zining .UZ domen hududidagi nomlarni ro‘yxatga olish va uzaytirish bilan bog‘liq faoliyatini to‘xtatdi. Bu haqda “Spot” xabar berdi.

“Yagona integrator tomonidan xizmat ko‘rsatilgan domen egalari o‘z domen nomlarini (domen transferi) .UZ hududidagi istalgan rasmiy registratorga o‘tkazishlari mumkin”, — deyiladi xabarda.Qayd etilishicha, ushbu qaror Uzinfocom’ga registrator va .UZ domeni ma’muriyati orasidagi aniq funksiyaga amal qilishi hamda registratorlarning raqobatbardosh tizimini rivojlantirish imkonini beradi.Uzinfocom O‘zbekistonning yuqori pog‘onadagi domenlari administratori sanalib, ma’lumot e’lon qilingan vaqtda 320 domenning registratori bo‘lgan.