Navoiy viloyatining Karmana tumanida “Hunarmand” markazi foydalanishga topshirildi. Markaz qurilishiga 7 milliard so‘mdan ortiq mablag‘ sarflangan. Bu haqda “Turon 24” xabar berdi.
Markaz ikki qavatdan iborat bo‘lib, unda ko‘rgazma zali, hunarmandchilik mahsulotlarini tayyorlash xonalari, qadimiy shiyponlar ko‘rinishida jihozlangan muloqot xonalari hamda hunarmandlar choyxonasi tashkil etilgan.
“Viloyatimizda ko‘zga ko‘ringan 30 nafar eng sara usta hunarmandni yig‘dik. Markazda hunarmandlar ijara va tag joy to‘lovlarini to‘lamaydi. Kelajakda ko‘rgazma zalida nafaqat 30 nafar, balki boshqa hunarmandlarning ham mahsulotlari savdosi yo‘lga qo‘yiladi. Viloyatda misgar, o‘ymakor, kulol hamda atlas va adras to‘qish singari hunarmandchilik yo‘nalishlari bo‘yicha ishlaydigan mutaxassislar yetishmaydi. Shu bois, markazda mazkur hunarmandchilik turlari bo‘yicha qo‘shni viloyatlardan mutaxassislar chaqirtirilib, navoiylik hunarmandlarga mahorat darslari tashkil etilishi rejalashtirilmoqda”, — deydi “Hunarmand” uyushmasi viloyat boshqarmasi boshlig‘i Jamshid Jumayev.
Jamshid Jumayev, shuningdek, ko‘rgazma zaliga respublika bo‘yicha eng sara hunarmandchilik namunalari jamlangan 600 million so‘mlik mahsulotlar keltirilganligi, viloyatga kelgan turistlar hamda mahalliy aholi ham ularni xarid qilish imkoniyatiga ega bo‘lishini aytib o‘tdi.
Izoh (0)